АҞӘА, лаҵарамза 27 – Sputnik. Аԥсны Ацҳаражәҳәаҩ Игор Ахбеи Чувашиа Ахада Михаил Игнатеви лаҵарамза 26 рзы имҩаԥысыз реиԥылараан Михаил Игнатиев иҳәеит Чувашиатәи аекспорт шьаҭаны ишаиуа ахаа-аалыҵи атехникеи.
Игнатиев иазгәеиҭеит атәылақәа рыҩба рыбжьара атауареикәыршара шеизҳаз. Уаанӡатәи ашықәсқәа ирыдкылан уахәаԥшуазар уи хәынтә еиҳахеит.
Аиҳарак Аԥсни Чувашиеи русеицура мҩаԥысуеит атуризм, ааглыхра, ақыҭанхамҩа русхкқәа рҟны.
Игор Ахба иазгәеиҭеит абарҭ ахырхарҭақәа рыла иахьа Аԥсны инарҭбаау аусурақәа шымҩаԥысуа. Игнатиев иҳәеит дышгәыӷуа иаарласны аҩтәылак русеицура адокумент шьаҭа аманы иҟалап ҳәа.
Игор Ахба иазгәеиҭеит Аԥсни Урыстәылеи рыбжьара анапы шрыҵаҩу 80 инареиҳаны еиқәшаҳаҭра.
