АҞӘА, лаҵарамза 31 – Sputnik, Роберт Џьапуа. Аԥсны ацентртә алхратә комиссиа атәыла Ахада иахь инанашьҭит Аԥшьгаратә гәыԥ ареферендум амҩаԥгаразы иҟанаҵаз адҵа аԥкаанҵа. Абри атәы Sputnik акорреспондент иеиҳәеит Аԥсны ацентртә алхратә комиссиа ахантәаҩы Баҭал Табаӷәуа.
“Лаҵарамза 19 рзы алхратә комиссиа атәыла Ахада иахь инанашьҭит ареферендум амҩаԥгаразы адҵа аԥкаанҵа", — иҳәеит Табаӷәуа.
Иара ишиҳәаз ала аԥшьгаратә гәыԥ адҵаҟаҵараҟны еилагара ыҟам.
"Ҳара аилатәара ҳаман. Иҳазнаргаз адокументқәа зегьы ҭаҳҵааит. Дара азакәан иақәшәо ишьақәыргылоуп. 19 нызқь инарзынаԥшуа анапаҵаҩрақәа еизгоуп", — иҳәеит иара.
Иара убасгьы иазгәеиҭеит "Ареферендум азы" ахәҭаҷ 15 инақәыршәаны атәыла Ахада изынарышьҭыз адокумент ҩымчыбжьа рыҩныҵҟа аҭак аиҭароуп.
Хәажәкырамза 2016 шықәсазы аԥшьгаратә гәыԥ атәыла Ахада заанаҵтәи иԥхьатәаразы ареферендум амҩаԥгаразы арзаҳал нарышьҭит Аԥснытәи ААК(ЦИК) ахь.
