АҞӘА, рашәарамза 3 — Sputnik, Бадраҟ Аҩӡба. ConIFA ачемпионат аҟны 1/4 афинал аан Мраҭашәаратәи Ермантәылеи Пенджаби ркомандақәа еицыхәмаруан рашәарамза ҩба рзы. Абри ахәмарраҟны Пенджабаа аиааира ргеит 3:2 ҳәа, афиналбжахьгьы инеиит.
Абри ахәмарраан Мраҭашәаратәи Ермантәыла Чагос акоманда иаиааихьан, аха Аԥснытәи акоманда ианацыхәмаруаз иаҵахахьан.
Пенджаб акәзар, Сомалиленди Лапландиеи ркомандақәа ириааихьан.
Аԥхьатәи ампыл ҭаиршәит Амар Куливари. Ермантәылатәи ашьапылампыласыҩцәа ракәзар уи еиҳагьы иаргәааит.
Иҳәатәуп ахәаԥшыҩцәа реиҳараҩык аерман шьапылампыласыҩцәа ишрыдгылоз.
Актәи атаим абжарахь ианнеиуаз ампыл аиҳарак пенджабаа рдәаҿы акәын иахьыҟаз.
36-тәи аминуҭи 44-тәи аминуҭи рзы Амар Куливари ампылқәа ҭеиршәуеит. 3:0 ҳәа ахәмарра мҩаԥысуан. Аҩбатәи атаим аан, 67-тәи аминуҭ азы Мраҭашәаратәи Ермантәыла ампыл амба иҭанаршәит.
Аҽа жәа-минуҭк аниас аҽа мпылкгьы уи инашьҭаххит. Аҵыхәтәан Мраҭашәаратәи Ермантәыла егьа аҽышәара ҟанаҵазаргьы уаҳа лҵшәа амоуит. Афиналбжаҟны Пенджаб акоманда Паданиатәи акоманда иаԥылараны иҟоуп.
