АҞӘА, рашәарамза 20 – Sputnik, Владимир Бегунов. Аҭыԥантәи анхаҩы ибаҳчараҟны ибеит зыҭра ихшәаз зҵыхәа шкәакәоу ашьхауарба. Уажәы уи аиқәырхареи ахьчареи рнапы алакуп аҭыԥантәи ауааԥсыра реиԥш аҵарауаагьы, ҳәа еиҭеиҳәоит Аԥснытәи аекологиа аинститут адиректор Роман Дбар.
"Зҵыхәа шкәакәоу ашьхауарба хыԥхьаӡарала имаҷӡоуп, адунеи зегь аҟны иара рыхьчоит", — иҳәеит Дбар.
Аҵарауаҩ иажәақәа рыла уи аԥырра аҵаанӡа Шәқәырча ааигәара идыргыло авольер аҟны аамҭала иҭаркуеит, нас иоурыжьуеит.
"Ааԥынрази ҭагалани Аԥсны иахыԥраауеит миллионла аԥсаатә. Зҵыхәа шкәакәоу ауарбақәа абри ақыҭа мацараҟноуп иахьыҟоу", — иҳәоитт аҵарауаҩ.
Аԥсабара ахьчара ауаа адрыԥхьаларц азы ашьхауарба ҵыхәашкәакәа Аӡҩыбжьа ақыҭа иасимволны иҟарҵарц ауп. Иаарласны аҭелтә еилахәырақәа руак уи асахьа зну абаннер абраҟа иқәдыргылоит.
