АҞӘА, рашәарамза 20 – Sputnik, Роберт Џьапуа. Аԥсны гостроль ҳасабла иааны иҟоу Ҟарачы-Черқьессктәи артистцәа аԥсуа сценахь ицәырыргеит Иулиа Тупикина лпиеса иалху аспектакль "Приезжала бабка в город". Иара ихнаркәшеит агострольтә қәгыларақәа.
Атеатр адиректор, асахьаркыратә напхгаҩы Хасан Биджиев иажәақәа рыла уаанӡа уахьырзымдыруаз асценаҟны ақәгылара еснагь ацәанырра ҷыдақәа аҵоуп.
"Раԥхьаӡа акәны џьара ақәгылара еснагь угәы архыҭ-хыҭуеит. Сгәы иаанагоит ахәаԥшцәа ҳаргәаԥхеит ҳәа!", — иҳәеит Биджиев.
Ахәаԥшцәа ракәзар ргәаанагарақәа ҳацеиҩыршеит гәаԥхарала:
"Арежиссиор ицәыригаз апроблема атәы схаҭа ибзианы издыруеит. Ақыҭақәа рҟынтәи ақалақьқәа рахь иаауа ирцәыӡуа рацәоуп. Иаҳҳәап: атрадициақәа, аҭаацәара, аигәылара, агәаартра уҳәа ирацәаны ашьҭахьтәи аплан ахь ирцәиасуеит", — лҳәеит Москвантәи иааны иҟоу ахәаԥшыҩ, Марина.
Абиԥарақәа реимак, еиҳарак иахьатәи аамҭазы иҵарны иқәгылоуп ҳәа иԥхьаӡоит арежиссиор Хасан Биджиев.
Ахәаша, рашәарамза 17 рзы аԥсуа хәаԥшҩы ахә ишьон аспектакль "Боинг-Боинг".
