ГАГРА, ԥхынгәы 10 — Sputnik, Саида Жьиԥҳа. Гагра араион алхратә ҭыԥ хадақәа зегьы рҟны сиала рыбжьы рҭиирц рылшон 26 нызқьи 317-ҩык алхыҩцәа. 20:00 сааҭ рзы, аамҭалатәи алҵшәақәа рыла алхратә ҭыԥқәа зегьы рҟны рыбжьы рҭиит 500-ҩык.
Иаҳҳәозар, аабатәи алхратә ҭыԥ хада иаҵанакуа алхратә ҭыԥқәа рҟны, иааизакны асиа иарбоу 4 577-ҩык рахьтә, рыбжьы рҭиит 85-ҩык алхыҩцәа.
Ажәбатәи алхратә ҭыԥ хада иаҵанакуа алхратә ҭыԥқәа рҟны, асиа иарбоу 5 167-ҩык рахьтә, рыбжьы рҭиит 89-ҩык. Ажәабатәи алхратә ҭыԥ хада иаҵанакуа алхратә ҭыԥқәа рҟны, асиа иарбоу 4 480-ҩык рахьтә рыбжьы рҭиит 66-ҩык.
Ажәеизатәи алхратә ҭыԥ хада иаҵанакуа алхратә ҭыԥқәа рҟны, асиа иарбоу 7 093-ҩык рахьтә, рыбжьы рҭиит 135-ҩык алхыҩцәа. Ажәаҩатәи алхратә ҭыԥ хада иаҵанакуа алхратә ҭыԥқәа рҟны, асиа иарбоу 5 000-ҩык рахьтә, рыбжьы рҭиит 125-ҩык. Иааидкыланы абжьыҭирахь инеиит 500-ҩык алхыҩцәа.
Алхратә ҭыԥ хадақәа рхантәаҩцәа излазгәарҭаз ала, алхратә ҭыԥқәа рҟны, абжьыҭира мҩаԥысуан еилагарада, аха иааиз рхыԥхьаӡара маҷын.
"Ҳара ҳалхратә ҭыԥқәа зегьы, ишахәҭоу еиԥш иазыхиан алхрақәа рымҩаԥгара. Аха абжьыҭира иааиз рхыԥхьаӡара зынӡа илаҟәын. Сгәаанагарала уи зыхҟьаз, ауааԥсыра ареферендум азы аинформациа цқьа еилкааны иахьырзымдыруаз ауп", — иҳәеит 10-тәи алхратә ҭыԥ хада ахантәаҩы Борис Лазба.
