АҞӘА, ԥхынгәы 10 – Sputnik, Владимир Бегунов. Атәыла ахадара иахәҭаз аҭагылазаашьақәа аԥырҵеит ажәлар ишырҭахыз еиԥш рыбжьы рҭиразы, уи ацентртә алхратәз комиссиа ахаҭарнакцәагьы ажурналистцәагьы иазгәарҭеит, абри атәы аанацҳауеит атәыла ахада ипресс-маҵзура.
Ари аҳәамҭала апресс-маҵзура, ареферендум амҩаԥгара зҭахыз аоппозициа ирыднаҵаз ахара рыдрымкылеит.
"Аоппозициатә мчрақәа рҳәамҭақәа рҿы еиҭахгьы ирҳәац рҳәоит атәыла анапхгара рзы, атәыла Ахада Рауль Ҳаџьымба иганахь алагьы", — ҳәа ануп аҳәамҭаҿы.
Иара убас апресс—маҵзура излаанацҳауа ала, аоппозициа ишиашо ицо аефир аҿы иқәгыларц алшара рыман изныкымкәа, аха дара мап ацәыркуан.
Аԥсны атәылауаа ԥхынгәы 10 рзы, ареферендум аҿы зҵаара заҵәык акәын ирзықәгылаз: "Аԥсны Ахада заанаҵтәи иалхрақәа аҭахуп ҳәа ишәыԥхьаӡома?"
Асааҭ 18:00 рзы рыбжьы рҭихьан 1 322-ҩык. Уи процентла иартәоит 0,99 %.
