АҞӘА, ԥхынгәы 11 – Sputnik, Владимир Бегунов. Ареферендум азы аԥарақәа арезервтә фонд иахыхын. Арезервтә фонд ззырхоу ҭагылазаашьа ҷыдак аан аныхра, ачымазцәа ӷәӷәақәа ацхыраара рыҭара, аҟыбаҩ ҷыда злоу ахәыҷқәа рҵара аԥаразоужьра роуп, иҳәеит Аԥсны Аекономика аминистр Адгәыр Арӡынба имҩаԥысуаз абрифинг аҟны.
"Ареферендум иахҭынҵан ашәахтәшәаҩцәа рԥарақәа. Сара уаанӡагьы исҳәон, еиҭасҳәахуеит аԥарақәа ныхуп, арахь политикатә лҵшәак ыҟан иҟам", — иҳәеит аминистр.
Иара убасгьы дазааҭгылеит Москва, аилахәыра Strategy Partners Group анапхгараҿы аилацәажәарақәа. Аилахәыра адыԥхьалоуп Аԥсны аҿиара апрограмма аус адулара.
"Амза анҵәамҭазы атуризм иазку аилацәажәара мҩаԥаагараны ҳаҟоуп. Ҳара ҳзы ихырхарҭа хадақәаны иҟоуп: атуризм, аԥсыӡтә ааглыхра, ашәыри ауҭраҭыхи аусрыдулара", — иҳәеит иара.
Адгәыр Арӡынба иажәақәа рыла аус ауеит акредитзоужьра апрограмма. Иара аҳәаақәа ирҭагӡаны уажәазы ихацыркхоит апроект дуқәа ҩба, иаздырхиоит аҽа ф-проектк.
Арӡынба иазиԥхьаӡоит ареспублика аекономикатә зҳаразы иахәҭоу зегьы амоуп ҳәа. Атәыла ауааԥсыра рылшарақәа зегьы уи иазырхахар, фба, быжьба шықәса рыҩныҵҟа зегь ҭышәынтәалоит, иманшәалахоит.
