Sputnik, Сырма Ашәԥҳа
Фазилеҭ Агәымааԥҳа диит Адаԥазар иаҵанакуа Џьгьарда ақыҭа, иахьа дынхоит Каиалар. Лаб, Илмаз Агәмаа 1975 шықәса рзы, раԥхьатәи агәыԥ иаланы Ҭырқәтәылантәи Аԥсныҟа иааз ҳџьынџьуаа злахәыз аофициалтә делегациа далан.
Фазилеҭ лан Қапԥҳан, ланду Багаԥшьԥҳан. Аԥсуара аҳра ахьауаз ари аҭаацәараҿы, Фазилеҭ аԥсыуаҵасла илызҳауан. Аиҳабацәа ааидтәаланы аԥсышәала ианеицәажәоз, еснагь ллымҳа кыдҵаны дырзыӡырҩан. Каилар инхо аԥсуаа рхыԥхьаӡара рацәаҩуп. Ари ақыҭа аԥсуа қыҭа зынӡа еиԥшуп. Иаадрыхуеит аџьықәреи, ирзануп арахә-ашәахә, ирааӡоит ауҭраҭых. Аԥснынтә аиҳабацәа зеиқәырхара рылшаз зегьы аҿарацәа ирымардоит.
"Сара ахааназы сгәы иҭҵәом саб Аԥснынтә даныхынҳә имаз игәалаҟара зеиԥшраз. Уи ихаҿсахьа, игәырӷьара сылақәа ирыхгылоуп иахьагьы. Ауаҩы аԥсадгьыл анимоу, ихатәы бызшәала данцәажәоу, иарбан уи еиҳа еиӷьу насыԥс иҟоу? Уи ус шакәыз агәра згеит атәым дгьыл аҿы сахьыҟоу. Ууаажәлар уанрыланхо, уԥсадгьыл уӷәӷәаӡа уанықәгылоу, уаҟара уцымлар ҟалома?!", — дцәажәон Фазилеҭ ахьаагареи агәыбылреи деимаркуа.
Хылҵшьҭрала иаԥсыуоу, Ҭырқәҭәыла инхо ҳџьынџьуаҩ Фазилеҭ Агәмааԥҳа, дусдкылаҩуп. Лара дахьынхо атәылаҿы ааигәа лыхьӡ ҳәан иреиӷьу абизнес ԥҳәызба ҳәа.
Фазилеҭ акыр шықәса аус луан аҳәынҭқарратә аҳазалхратә усбарҭаҿы. Анаҩс, Адаԥазар ақалақь аҿы иаалыртит лхатә фирма "Аллианз". Уи азкуп аԥгаԥсатә еилахәыра аиҿкаара. Фазилеҭ Агәымааԥха лфирма аимадара амоуп Европа еиуеиԥшым аҳәынҭқаррақәа рҿы.
"Сара сыԥсадгьыл гәыла-ԥсыла садҳәалоуп. Аԥсныи сареи аимадара ҳабжьоуп акыр шықәса раахыс. Исымоуп Аԥсны атәылауаҩ ишәҟәы. Сара сыԥсҭазаара аҿы зегь реиҳа гәаҳәарас исымоу — Аԥсны абизнес аиҿкаара ауп. Аус рыдызулоит еиуеиԥшым апроектқәа".
Сгәы иаанагоит сыгәҭакқәа рынагӡара. Исҭахуп Аԥсны еизҳалар, иҿиалар, амҩа ԥшӡа еснагь ихьамҵуа ианызарц. Ҳарҭ, Аԥсны иҟоу ҳауаажәлар рыла ҳгәы ӷәӷәоуп. Аԥхьаҟа ҳаимадара, ҳаибабара, ҳаигәныҩра иҵегьы аҽарҭбаап. Изызҳауа, ҳзеигәырӷьо аҿар ҳамоуп.
Аԥсуаа, аԥсҭазаара бзиа иаабоит, агәкажьра ҳалаӡам. Ҳара ҳазланхо атәым жәлар ирдыруеит доуҳала шаҟа ҳаҭбаау, аиаша ҳшазықәԥо, агәкажьра шҳалам. Аҭоурых егьа ҳкыднаҟьазаргьы агәра ҳгоит ԥсра-ӡра шҳақәым. Анцәа иҳәааит ҳаԥсадгьыл ԥшӡа, ҳаҩнду-Аԥсынра хаиднакыло", — дцәажәон гәыблыла Фазилеҭ Агәымааԥҳа.
