АҞӘА, ԥхынгәы 22 – Sputnik, Бадраҟ Аҩӡба. Ҭырқәтәыла аҭагылазаашьа ҷыда алагалара аҵаҵӷәы аман, иҳәоит Ҭырқәтәыла иҟоу Аԥсны Ахаҭарнак Инар Гыцба.
"Ҳара ҳдиаспора ракәзар, аҭагылазаашьа ҷыда алагалара аҩныҟаполитикатә ҭагылазаашьа арманшәаларазы имҩаԥгоу усуп ҳәа иазырыԥхьаӡоит", — иҳәеит иара.
Аҭагылазаашьа ҷыда аԥсуа диаспора ахаҭарнакцәа рҭоурых ԥсадгьыли дареи реинырра иаԥырхагахом ҳәа азгәеиҭоит Гыцба.
"Ҭырқәтәыла Ахада иажәақәа рыла аҭагылазаашьа ҷыда алагалара иаанагом атәылауаа реиҭаҵра иаԥырхагоуп ҳәа. Насгьы ҳара ишаадыруа ала ареис Стамбул-Шәача еиԥымҟьарада аус ауеит", ҳәа азгәеиҭоит иара.
Ҭырқәтәылатәи арепатриант, ашәҟәыҩҩы, ауаажәларратә усзуҩы Октаи Чкотуа игәаанагарала аҭагылазаашьа ҷыда Ҭырқәтәыла ауааԥсыра рыԥсҭазаара аруадаҩуеит.
"Сара сгәаанагарала ауаа рзинқәа еилагахоит. Ҭырқәтәыла Европатәи ҳәынҭқаррам. Араҟа азакәанқәа еиқәышәшәа аус руам, ауаа рзинқәагьы иахьынӡахәҭоу ихьчам", — иҳәоит иара.
Ердоган иажәақәа рыла аҭагылазаашьа ҷыда алагалоуп ақәгылара иалахәу ахаҿқәа рганахьала иахәҭаны иҟоу ауснагӡатәқәа хра рыманы адкыларазы.
Иара убасгьы иазгәеиҭеит аҭагылазаашьа ҷыда адемократиеи ауааԥсыра рзинқәеи ишрԥырхагам.
Ԥхынгәы 16, ахәаша ауха Ҭырқәтәыла аҭыԥ аман абџьар ахархәарала атәылаҟны амчра ахҳәара. Асабша ашьыжь аруаа дырҭаслымуа иалагеит. Атәыла анапхгара алаҳәара руит амчра рнапаҿы ишыҟоу ала.
Азинмчрақәа иахьазы иааныркылахьеит 6000-ҩык рҟынӡа арратә чынқәа. Аҵыхәтәантәи адыррақәа инарықәыршәаны иҭахеит 290-ҩык ауааԥсыра. Ҭырқәтәыла анапхгара аҭыԥ змаз ахҭыс зхароу ҳәа ихьӡ рҳәеит аоппозиционер Фетхуллах Гиулен, ЕАШ (США) инхо.
