Аԥхынтәи атуристтә сезон ҳҭагылоуп. Атәыла аԥшӡарақәа ирацәаҩуп иадрыԥхьало ауаа. Ҳкорреспондент Роберт Џьапуа иӡбеит маҷк ԥхьаҟа днеиҭаҵны аӡынтәи аԥсшьара далацәажәарц, апроект "Ишьхатәылоу Аԥсны" анапхгаҩы Ҭенгьиз Ҭарба диҿцәажәарц.
- Иааиуа аӡынразы дарбанызаалак изҭаху иоуама алшара Ауадҳара аԥсшьаразы мамзаргьы иара макьаназы иазыҟаҵоу атурист иакәу зыдкылара алшо?
— Изҭаху дарбанызаалак илшоит ашьха аҟазаара, аха ашәарҭара ҳәарада иҟоуп. Убри азы ара иҟоу атуристтә база "Ажара" асасцәа шаднакылоугьы аркьаҿрақәа ҟанаҵоит. Ирыдыркылоу еиҳарак ашәҩаныҟәаҩцәа роуп.
Аӡын ашәарҭарақәа еиҳа ирацәоуп. Риҵаҟа ухаланы асырбылгьа аҟаҵара – уи аҽакуп.
- Аӡын апутиовка уоурц азы иабадҵаалатәу? Еиҿкааҩыс иҟада?
— Иахьатәи аамҭазы иҟоу турбаза заҵәык ауп. Дара роуп аԥсшьарақәа еиҿызкаауагьы.
- Аԥсуа шьхақәа рзы иҟазшьоуп асыбымбылра. Адунеи аҟны ус иахьыҟоу Алиаска, Иапониа, Мраҭашәаратәи Кавказ рҟны мацароуп. Ԥеиԥшс иҳамоузеи ҳара?
— Сынтәа ҩымз инарзынаԥшуа ашьхара ҳаҟан. Ҳара дҳацҟан асноуборд азы Европа ачемпион Оксана Чекулаева. Лара еиқәуԥхьаӡаз аҭыԥқәа зегьы рҟны днеихьеит. Иагьылыԥхьаӡоит ԥхьаҟазы Ауадҳара адунеи аскитурцәеи африраидцәеи рзы центрк еиԥшны иҟалап ҳәа.
- Ашәарҭадара аганахьала аҭагылазаашьа шԥаҟоу?
— Уажәазы АҶА аусзуҩцәа Ауадҳара иҟаӡам. Ҳара иаҳҭахыҵәҟьоу аспециалистцәа Аԥсны иҟаӡам зынӡагьы.
- Иахьа Аԥсны ашьхатә туризм иатәны аԥхын имҩаԥыргои?
— Алшарақәа рацәоуп. Амаршрутқәа аԥҵаны уныҟәалар ҟалоит, арафтинг, аканьонинг, аспелеотуризмом уҳәа ирацәоуп. Аспелиологцәа рзы аинтерес аҵоуп Гагреи Бзыԥҭеи рышьхеибаркырақәа рҟны аҳаԥқәа рыҭҵаара. Ҳара иҳамоуп адунеи аҟны зегь раасҭа иҵаулоу аҳаԥқәа хԥа. Ишахәҭоу уазныҟәар Еверест ахьӡ шыҭбаау еиԥш дара рыхьӡқәагьы рылаҵәар ауеит.
- Аҵыхәтәантәи азҵаара. Упроект иацуҵома?
— Ҳәарада апланқәа рацәаны исыгәҭакуп. Аусутәгьы акыр ирацәоуп. Иара аусурагьы даара исгәаԥхоит. Ажәакала апроектқәеи аидеиақәеи рацәоуп. Урҭ рынагӡароуп иаҭахны иҟоу.
