АҞӘА, нанҳәа 9 – Sputnik, Бадраҟ Аҩӡба. Аԥсны агәабзиарахьчара аминистр инапынҵақәа назыгӡо Андзор Гоов апресс-конференциа мҩаԥигеит агәабзиарахьчара асистема ҿыц аиҿкаареи ашықәс актәи азыбжеи реихшьаалақәа рымҩаԥгара инарыдҳәаланы. Апресс-конференциаҟны аминистр иазгәеиҭеит Аԥсны атәылауаа Урыстәыла рыхәышәтәразы сынтәатәи ашықәс азы 37 миллион мааҭ харџьуп ҳәа.
"Ҳара уаанӡатәи ҳуалқәа ҳшәоит. Уажәы ачымазцәа Урыстәылаҟа рышьҭра шьақәҳартәоит. Зегьы уахь рышьҭра иашам", — иҳәеит Гоов.
"Ҳара ҳҳақьымцәагьы аӡәы иҵахом дыррала. Уаанӡа аҳәаа анхыҵҟа иаҳашьҭуаз ачымазцәа араҟагьы рыхәышәтәра алҳаршартә ҳаҟоуп", ҳәа азгәеиҭеит аминистр.
Иара дазааҭгылеит ахәышәтәырҭақәа амыруга ҿыцқа рыла иахьеиқәыршәахо инамаданы акыр чмазара атәыла аҩныҵҟа уриааиртә иҟалоит ҳәа.
"Ҳара уажәы ишьақәҳаргылоит атәыла анҭыҵҟа ахәышәтәра ада ԥсыхәа змам ачымазарақәа", — иҳәоит Гоов.
Уажәазы Урыстәылаҟа ицо реиҳараҩык аонкологиа чымазареи агәыхь чымазареи змоу роуп.
