АҞӘА, нанҳәа 10 – Sputnik, Бадри Есиава. Амина Аншԥҳа 18 шықәса рҟынӡа зхыҵуа аспортсменцәа рыбжьара атеннис азы Европа ачемпионат аҟны аиаара лгеит Клостерс ақалақь аҟны (Швейцария) ԥхынгәы 24 2016 шықәса рзы. Уажәы лара Ниу-Иорк цәыббрамзазы имҩаԥысраны иҟоу аҿар ртурнир "US OPEN 2016" далахәхоит.
"Сара уажәы сҽазыҟасҵоит аҿар ртурнир "US OPEN 2016" иазыԥхьагәасҭоит сҽазыҟаҵарақәа Маиами рыцҵара", ҳәа еиҭалҳәоит Амина.
Аԥсуа спортсменка лажәақәа рыла атурнир даара ахьӡ амоуп. Иара иалахәхоит 60-ҩык рҟынӡа.
Амина мчыбжьык ахь фымш лҽазыҟалҵоит, мышкы ԥышьсааҭк рҟынӡа. Аспортсменра акыр иуадаҩуп. Атеннисистка қәыԥш илҳәоит аспортсмен ифатә дацклаԥшлароуп, ицәа дацклаԥшлароуп ҳәа.
Афинал аҟны Амина длыцыхәмаруан командак илыцалоу Олесиа Первушина. Ҩымз раԥхьа лара атурнир ITF (Trofeo Bonfiglio) аҟны, Милан, Амина илаԥылгеит.
"Аиндаҭлара уадаҩын. Олесиеи сареи ҳаиҩызцәоуп. Уҩыза индаҭлара цәгьоуп", — лҳәеит Амина.
Атеннисистка иара убасгьы илҳәеит лыԥсадгьыл абираҟ даҵагыланы дықәгылар шылҭахыз, аха макьаназы уи аҩыза аҭагылазаашьа шыҟам.
Амина Аншԥҳа 2013 шықәсазы Европа актәии аҩбатәии аԥкьаҭ ҳәа дыԥхьаӡан. Сынтәагьы лара ҳларгәырӷьоит лықәҿиарақәа рыла. Ааигәа Ташкент имҩаԥысуаз аицлабраҿы аиааира лгеит, иара убас Словакиа имҩаԥысуаз 18 шықәса зхымҵыц ркатегориаҿы даиааиит. 2016 шықәса рзы Испаниеи Италиеи имҩаԥысуаз атурнирқәа дрылахәын, Бельгиатәи атурнир ITF 52nd Astrid Bowl Charleroi, Belgian International Junior Championships аҟны аԥхьахәқәа лгоит. Амина лҽазыҟаҵарақәа мҩаԥылгоит аспорттә школ "Спартак" азыҟаҵаҩ Евгениа Куликовскаиа лҿы.
