АҞӘА, нанҳәа 18 — Sputnik. Европатәи аилахәырақәеи Ҟрыми аилахәаахәҭра рыбжьоуп асанкциақәа ирыхьмырԥшыкәа. Аҵыхәтәантәи аҩышықәса рыҩныҵҟала Евроеидгыла абираҟ иаҵагылоу аӷбақәа 24, Евроеидгыла иҭаҩу аӷбақәа 43 Ҟрымҟа инеихьеит. Абри атәы аанацҳаит еиҿкаау ацәгьоурақәеи акоррупциеи рыҭҵаара Ацентр (OCCRP).
Асанкциақәа ирықәымныҟәарц азы аилахәырақәа еиуеиԥшым амҩақәа рыԥшаауеит, ҳәа азгәарҭоит еиҿкаау ацәгьоурақәеи акоррупциеи рыҭҵаара Ацентр (OCCRP) аҟны. Иҟоуп анаплакқәа зыӷбақәа егьырҭ аҳәынҭқаррақәа рбираҟқәа ирыҵазыргыло, иҟоуп аҽа фирмақәак зхы иазырхәо.
Убас, анемец еилахәыра Krey Schiffahrts GmbH аӷбақәа руак Керчтәи абаӷәаза иҭалеит 2014 шықәса ԥхынгәымзазы. Афирма анапхгара OCCRP азыҳәақәа рҭак ҟанамҵеит.
Аилахәыра Palmali аҭырқәа гәыԥ аусзуҩ ишиҳәо ала абираҟқәа рыԥсахуеит адгьылбжьаха ианазааигәахалак ашьҭахь. Аԥхьа украинатәи абираҟ рхы иадырхәоит, нас урыстәылатәи ала ирыԥсахуеит.
OCCRP — еиҿкаау ацәгьоурақәеи акоррупциеи рыҭҵаара знапы алаку ажурналистцәеи арепортиорцәеи реидгылоуп.
Ҟрым аганахьала асанкциақәа алагалан 2014 шықәса рашәарамзазы.
