АҞӘА, цәыббра 6 — Sputnik, Бадраҟ Аҩӡба. Аԥсуа спортсмен Енрике Аргәын цәыббра 3 рзы Ирландиа имҩаԥысуаз акикбоксинг азы адунеи Ачемпионат аҟны аԥыжәара игеит. Уажәы иара Аԥсныҟа дхынҳәит.
"Сара насыԥ сыманы схы збоит. Схықәкы насыгӡеит – адунеи сачемпионуп. Афиналтә еиԥылара ашьҭахьтәи аминуҭқәа рзы схы агәра згомызт, исылсыршеит ҳәа сыҟамызт аиааира. Ҭабуп ҳәа иасҳәар сҭахуп сазыҟаҵаҩ Џьон Аҭәмаа, ҭабуп ҳәа расҳәар сҭахуп Урыстәылатәи сазыҟаҵаҩцәа", — иҳәоит адунеи ачемпион Енрике Аргәын.
"Енрике ԥшьышықәса инарзынаԥшуа аҽазыҟаҵарақәа мҩаԥигоит. Ҳара иҳалшоз зегьы ҟаҳҵон", — иҳәоит акикбоксинг азы Аԥснытәи акоманда азыҟаҵаҩ, акикбоксинг азы Аԥсны Афедерациа апрезидент Џьон Аҭәмаа.
Иара иазгәеиҭеит Енрике Аладатәи афедералтә округ аҟны имҩаԥысуаз атурнирқәа рҟынгьы аԥхьахәқәа шигоз.
Џьон Аҭәмаа иажәақәа рыла Енрике Аргәын аҟыбаҩ ҷыда злоу спортсменуп, аиааира иазырхоу аҟазшьагьы имоуп.
Енрике Аргәын 16 шықәса ихыҵуеит. Иара аиааира игеит 54 кьыла зкапануа аспортсменцәа рыбжьара, лоу-кик ахәҭаҟны.
