ГАГРА, цәыббра 26 — Sputnik, Бадраҟ Аҩӡба. XV Жәларбжьаратәи аԥқьаҭасратә турнир "Большая Абхазская шляпа" ахәмарра иацҵахоит Москва. Абри атәы Sputnik акорреспондент изеиҭеиҳәеит атурнир аиҿкааҩ, Урыстәыла аҳәынҭқарратә Дума адепутат Константин Затулин.
Иара иажәақәа рыла актәи амш азы Гагра ақәоура иахьаҿыз иахҟьаны атурнир мҩаԥысуан Шәачатәи иарку аԥқьаҭасырҭақәа рҟны. Аҩбатәи амш азы Гагра ихәмаруан, аха усҟангьы амшцәгьа еиԥнарҟьеит.
"Атурнир хыркәшахоит Москва. Афиналтә хәҭа мҩаԥысраны иҟоуп иааиуа амҽышазы", — иҳәеит Затулин.
Есышықәса Гагра атурнир иаҭаауеит адепутатцәа, ауаажәларратәи аполитикатәи усзуҩцәа, акосмонавтцәа.
Атурнир иалахәын 26-ҩык. Аԥсны аԥқьаҭасразы атурнир амҩаԥгара аидеиа цәырҵит 2001 шықәса рзы. Аԥқьаҭасра абзиабаҩцәа, Константин Затулин зхадараҿы дыҟоу аклуб "Большая Шляпа" алахәылацәа роуп уи аԥшьызгаз.
