АҞӘА, жьҭаара 4 — Sputnik, Бадраҟ Аҩӡба. Аҩаша, жьҭаара 4 рзы Аҟәа иаатит жәларбжьаратәи аконференциа, аҵарауаҩ Шалуа Инал-иԥа ишәышықәсахыҵра инамаданы. Абри атәы ааицҳауеит ҳкорреспондент аҭыԥ аҟынтәи.
"Шалуа Инал-иԥа иналукааша ҵарауаҩуп. Аетнографиеи аҭоурыхи ирызку иусумҭақәа аԥсуа наука ахьтәы фонд иалахәуп", — иҳәеит Агуманитартә ҭҵаарақәа ринститут адиректор инапынҵақәа назыгӡо Сослан Салаҟаиа.
"Шалу Инал-иԥа аҭоурых, афольклористика, абызшәадырра, алитература инапы рылакын", — иҳәеит иара. Сынтәатәи аԥхьарақәа аамҭала ирықәшәеит аҵарауаҩ ишәышқәсахыҵра.
Аконференциа аҳәаақәа ирҭакны имҩаԥысуеит асекциақәа хәба: "Культура и быт народов Кавказа: традиции и современные трансформации", "Этногенез и исторический процесс на Кавказе от древности до нового времени", "Кавказ от Черноморья до Каспия: проблемы современного развития", "Литература и искусство народов Кавказа: проблемы типологии, жанровое многообразие, культурно-исторические взаимосвязи", "Состояние и проблемы Кавказского языкознания".
III Жәларбжьаратәи аконференциа иалахәхоит Москва, Ҟарачы-Черқесск, Адыгеиа, Ростова-на-Дону, Ҟабарда-Балкариа рҟынтәи аҵарауаа, иара убасгьы Калифорниатәи ауниверситет апрофессор Пола Гарб.
Аԥсны Ахада иабжьагаҩ Владимир Занҭариа даԥхьеит атәыла анапхгаҩы инашьҭымҭа.
Аԥсны Аҭҵаарадыррақәа ракадемиа апрезидент Зураб Џьапуа иқәгылараҟны иҳәеит аҵарауаҩ ибаҟа Аҟәа ишыргылатәу.
Аконференциа мҩаԥысраны иҟоуп хымш рыҩныҵҟа.
