АҞӘА, ԥхынҷкәын 1 – Sputnik, Роберт Џьопуа. АИХ (СМИ) иобиективу аинформациа ҟанаҵо иҟанамҵо аинтерес рымоуп амчрақәа рҟнеиԥш ауаажәларра рҟынгьы, аоппозициа рҟынгьы иҳәеит Аԥсны ажурналистцәа Реидгыла анапхгаҩы ҿыц Руслан Ҳашыг.
"Иарбанызаалак етапк аан ахәаԥшҩы ма азыӡырҩ, аԥхьаҩ ҳагәра имго ҳҟалар, уи игәрагара архынҳәра даара иуадаҩхоит. Уи ауаажәларра рзгьы аҳәынҭқарра азгьы ибааԥсуп. Агәра згоит дара ажурналистцәагьы рус профессионализм ҳаракыла анагӡара рҭахны ишыҟоу", — иҳәеит Ҳашыг.
Руслан Ҳашыг иажәақәа рыла аиҿкаара аусқәа ираԥхьагылоу акакәны дахәаԥшуеит зҟазара ҳараку аԥсуа журналистцәа реиҵааӡара, разыҟаҵара.
"Ажурналистцәа разыҟаҵара апроцесс Аԥснытәи Аҳәынҭқарратә университети ҳареи ҳаицхыраароуп. Аус рыдулатәуп еиуеиԥшым апроектқәа, иааԥхьатәуп азанааҭуаа, урҭ ара, аҭыԥаны имҩаԥыргаларц атренингқәа, амастер-классқәа. Даараӡак афинансдгылара аҭахымкәа имҩаԥугар ауеит усеиԥш иҟоу аусқәа» — иҳәоит иара.
Руслан Ҳашыг иазгәеиҭеит Аԥсны ажурналистцәа Реидгыла иахьазы ишалоу 100-ҩык ажурналистцәа. Урҭ реиҳараҩык атәанчарахьы ицахьо роуп.
