АҞӘА, ԥхынҷкәын 5 – Sputnik, Бадраҟ Аҩӡба. Еицырдыруа аԥсуа уарӷанарҳәаҩ Лука Гаделиа далахәын Жәларбжьаратәи афестиваль "Дорога в рождество" аҳәаақәа ирҭагӡаз аконцертқәа. Аконцертқәа мҩаԥысуан: Москва абҵара 26 рзы, Петри Павели ркофедралтә собор аҟны, Мурманск ԥхынҷкәын 4 рзы.
"Афестиваль қьырсазтәи аныҳәамшқәа ирзырхоуп. Имҩаԥысуеит ԥхынҷкәын 25 рҟынӡа. Ҳара ҳконцертгьы абри афестиваль аҳәаақәа ирҭагӡан", — иҳәеит Лука Гаделиа.
Москватәи аконцерт шьақәгылан: Бах, Вивальди, Гендель рырҿиамҭақәа рыла.
"Аконцерт барокко ахырхарҭа аман. Ауаа рацәан. Урыстәыла иҟоу Аԥсны Ацҳаражәҳәарҭа ахаҭарнакцәагьы ыҟан", ҳәа иҳәоит Гаделиа.
Мурмансктәи аконцертгьы азыӡырыҩцәа рацәаҩны еизнагеит.
Ари аконцерт мҩаԥысит раԥхьаӡа акәны ауарӷан алархәны. Уи ааигәоуп ианықәдыргыла. Афилармониа азал акустика оумашәа ибзиоуп, ҳәа еиҭеиҳәоит амузыкант.
Лука Гаделиа аконцерт аҟны инеигӡеит бароккои аромантизми раамҭа иаҵанакуа арҿиамҭақәа. Аконцерт иара убасгьы далахәын ашәаҳәаҩ Кристина Ешԥҳа..
Амузыкант иазгәеиҭеит ҽаангьы абри афестиваль ахалархәразы апланқәа рацәаны ишимоу. Иара убасгьы иҳәеит Аԥсынгьы имҩаԥгахараны ишыҟоу Қьырсаныҳәатә концертқәа.
