ГАГРА, ԥхынҷкәын 6 — Sputnik, Саида Жьиԥҳа. Ԥхынҷкәын 3 аҵхыбжьон ишьҭыҵыз амшын ацәқәырԥа иахҟьаны иҿабгеит 80 метра ашьаҟатә-арӷәӷәаратә ҭӡы, аӡы иагеит, 700 метра инарзынаԥшуа, Гагра ақалақь ӡыла еиқәзыршәоз 500 мм аҿыгҳара змаз, аӡымҩангагатә ҵәаҳәа, иара убас амшынӡи аԥслымӡи анышәаԥшьи ҩналеит аӡыҭгагатә станциа Репруа 2.
Иахьа уажәраанӡа, аԥсабаратә цәырҵра иахҟьаз аԥхасҭа аԥырҟәҟәара иаҿуп Гагратәи аӡыканал аусзуҩцәа.
"Ҳхатәы мчла аӡыҭгагатә станциа Репруа 2 иҩналаз аӡи анышәаԥшьи аԥслымӡи дәылаҳгеит, араҟа иҩнагылоу афымцатә агрегатқәа зегьы рмоторқәа цәаакит, ԥшьымш раахижьҭеи арбара ҳаҿуп. Цқьа ибаанӡа аҿакра шәарҭоуп, иблыр алшоит. Иара убас, уахи ҽни аӡымҩангагатә цәаҳәақәа реиларҭәара нап аркуп. Аҭырқәа фирма ари аҭыԥ иавганы ишьҭарҵаз ацәаҳәақәа рахь ҳаиасуеит, уаанӡа ишьҭаҵази дареи еиԥаҳшьоит", — иҳәеит Гагратәи аӡыканал аиҳабы Иури Цулукиа.
Ааха ахьыҟалаз аҭыԥ ааҟны аус руоит аспециалистцәа, аха дара макьаназы, Гагра ақалақьуаа аӡы анроуа аҳәара рцәыуадаҩуп. Избанзар, рус анагӡараҿы хадара ауоит амшгьы. Ҩаԥхьа ацәқәырԥа шьҭыҵыр, ашьаҟатә-арӷәӷәаратә ҭӡы еилаҳахьеит аҟнытә аҭагылазаашьа еицәахар алшоит.
Ашьаҟатә-арӷәӷәаратә ҭӡы ашьҭхразы, Гагра араион Ахадареи Аԥсныргылареи акапиталтә ргылареи рзы Аусбарҭеи иахәҭоу аусмҩаԥгатәқәа арыхәаԥшра иалагеит.
