АҞӘА, ԥхынҷкәын 12 – Sputnik, Бадраҟ Аҩӡба. Аҳәынҭқарра аиҳабы закәанла дааизар – дҳаиҳабуп, иҳәеит Ҭырқәтәыла иҟоу аҧсуа акультуратә центрқәа рфедерациа аиҳабы Аҳмеҭ Ҳапат.
"Анцәа ду ауаҩы даниша инаркны иахьа уажәраанӡа, аԥсы зхоу ҳазегь ҳаԥсуеит. Абри ҳдырыр, еиҳа еиӷьны ҳныҟәеибагоит. Ари иаҳа дааигәоуп, егьи иаҳа даҳцәыхароуп ҳәа ахымҩаԥгара ҟалаӡом", — ациҵеит уи.
Апресс-конференциа еиҿкаан Ҭырқәтәыла иҟоу аҧсуа акультуратә центрқәа рфедерациа иҟанаҵаз аҳәара ала.
Ҳапат иажәақәа рыла, иахьа афедерациа ахаҭарнакцәа рԥылоит Аԥсны аоппозициа ахадацәа иреиуоу Аслан Бжьаниа, иара убас, аиҳабыра. Аҳмеҭ Ҳапат агәра ганы дыҟоуп ҳаԥсадгьыл иазеицәоу ашьаҿақәа рыҟаҵара рҽырцәыхьчара шаҭаху, зегьы еидгыланы Аԥсны ԥхьаҟа изго аусқәа мҩаԥыргаларц шрыхәҭоу.
Ҭырқәтәыла иҟоу аҧсуа акультуратә центрқәа рфедерациа иҟанаҵаз аԥсуа жәлар рахь ааԥхьара хәҭакахьала абас аҳәоит:
"Ҳазҭагылоу аамҭа акырӡа ишыуадаҩу, насгьы саԥсыуоуп ҳәа зхы зыԥхьаӡо аӡәгьы игәы ишамыхәо зегьы еицаадыруа усуп. Зықьҩыла ҳҵеира рхы, рыԥсы ақәҵаны, ҳазҭахыз, иҳадгылаз зегьы рааԥсареи рыгәаӷьреи иалҵшәаны ҳнапаҿы иааҳгаз ҳхақәиҭреи, ҳхьаԥшымреи, ҳзыхӡыӡааша ак акәны иҳаԥхьаӡоит. Иара убри инақәыршәаны, ҳауаажәлар зегьы, адемократиатә ԥҟарақәеи, азакәанқәеи, ижәытәӡоу ҳкультура ишақәнагоу ала ахымҩаԥгашьа ашҟа ааԥхьара рзыҟаҳҵоит", — аҳәоит ааԥхьара.
Уи анаҩс, аиҳабыреи, аоппозициатә мчқәеи, ауаажәлар зегьи аҭагылазаашьа уадаҩ алҵра шрылшо агәрагара аарԥшуп иҟаҵаз аҳәамҭаҿы. Аҳәынҭқарра аԥеиԥш зыдҳәалоу ауаажәлари, аиҳабыреи, аоппозициеи реилибакаара ауп. Аҟазаареи аҟамзаареи рҳәаақәа ирҭысны, жәытә-натә аахыс ажәларқәа рыбжьара хьӡи-ԥшеи рыманы аҭыԥ аанызкылаз аԥсуа жәлар, иззымиааиша усӡам иахатәи ауадаҩра, ҳәа азгәаҭоуп ааԥхьара аҿы.
