АҞӘА, 14 – Sputnik. Аԥсны Ашәарҭадаратә маҵзура аофициалтә ҳәамҭа ҟанаҵеит. Аҳәамҭаҟны иарбоуп аоппозицатә мчқәа ирыгәҭакуп ажәлар реизара ахархәарала мчыла атәыла анапхгара рыԥсахра, атәыла Ахадагьы иахыхра ҳәа. Аҳәамҭаҟны иарбоуп Ашәарҭадаратә маҵзура ишамоу адыррақәа усеиԥш ҟалоит ҳәа. Абри атәы аанацҳауеит Аԥсны Ашәарҭадаратә маҵзура апресс-маҵзура.
Ашәарҭадаратә маҵзура адыррақәа рыла арадикал оппозиционерцәа ирыгәҭакуп абџьар ахархәара. Уи шьақәнарӷәӷәоит 2016 шықәса ԥхынҷкәын 11 рзы амаҵзура аусзуҩцәа ирыԥшааз абџьари аџьаԥҳани ҳәа арбоуп аҳәамҭаҟны.
2016 шықәса ԥхынҷкәын 11 рзы амаҵзура аусзуҩцәа Аҟәа, уаҩ дызхымыз ахыбраҿы ирбеит автоматқәа АК-74 8, агранатаршәга РПГ-7, аџьаԥҳаны.
Иҟоу адыррақәа рыла иаԥҵоуп абџьар змоу агәыԥқәа. Урҭ атәыла Ахада иусбарҭа иақәларц дҵаны ирымоуп. Ауаа рацәа реизгаразы аоппозициаа ақыҭақәа ирылаланы ауаа ирабжьыргоит ԥхынҷкәын 15 рзы Аҟәа еизарц ҳәа арбоуп аҳәамҭаҿ.
Иара убасгьы иазгәаҭоуп иахьатәи атәыла анапхгара рахҳәара аԥара азоурыжьуеит атәыла анҭыҵынтәи ҳәа.
Ԥхынҷкәын 15 рзы аоппозициатә мчрақәа рблок иазыԥхьагәанаҭоит рыдгылаҩцәа реизара, Аԥсны Ахада заанаҵы инапынҵақәа шьҭеиҵарц азы.
