АҞӘА, ԥхынҷкәын 14 – Sputnik. Аԥсны Ауаажәларратә палата ахеилак аҳәамҭа ҟанаҵеит амчра ахаҭарнакцәеи аоппозициатә мчрақәа рхаҭарнакцәеи рахь аиҿцәажәара хацдыркырц, ауаа еизырымгарц. Абри аус аҟны бжьаҟазацәак рыхьӡала ақәгылара ишазыхиоу рҳәеит. Аҳәамҭа рыларҵәоуп ԥхынҷкәын 13 рзы. Адокумент аҟны иарбоуп атәылаҿ иҟоу аҭагылазаашьа агәҭынчымра шарҵысуа, ауаажәларра иуашәшәыроу, амашәыр зхылҿиаар зылшо аҭагылазаашьахь ишцәырнаго.
"Ԥхынҷкәын 15 рзы аоппозициатә мчрақәа рблок имҩаԥнаго ажәлар реизареи атәыла амчрақәа рыдгылаҩцәа реизареи уззыԥшӡам ахылҿиаақәа рахь ҳкылыргар алшоит. Усҟан аҭакԥхықәра рыдлароуп амчра анапхгаҩцәеи аоппозициа алидерцәеи", ҳәа аҳәоит адокумент аҟны.
Ауаажәларратә палата ааԥхьара ҟанаҵоит аганқәа рыҩбагьы ажәлар реизгара мап ацәыркырц, аиҿцәажәарахь рхы дырхарц.
"Ауаажәларра рҳәоуеиқәшәареи аполитикатә процесс алахәылацәа азакәан рықәныҟәареи ирылшоит апроблемақәа рыӡбра. Аҽа мҩакы ҳҳәынҭқарразы ашәараҭара аманы иҟоуп", ҳәа арбоуп аҳәамҭаҟны.
Ауаажәларратә палата азыхиоуп аиҿцәажәарақәа рымҩаԥгара, еиҿагылоу амчрақәа рыбжьара абжьаҟазара алыршара.
