АҞӘА, ажьырныҳәа 25 — Sputnik, Бадри Есиава. Хәажәкыра 14 — 16 рзы Москва имҩаԥысраны иҟоу Жәларбжьаратәи ацәыргақәҵа МITT аҳәаақәа ирҭагӡаны Аԥсны Акурортқәеи атуризми рзы аминистрра имҩаԥнагараны иҟоуп еиуеиԥшым аиԥыларақәа. Абри атәы ҳзеиҭеиҳәеит аминистр ихаҭыԥуаҩ Асҭамыр Ахба.
Ари акьыԥхьымҭа урысшәала абраҟа шәаԥхьар шәылшоит >>
"Ҳара иҳагәҭакуп Аԥсны атурист-екскурсиатә еиҿкаарақәа рӡыргара, москва иҟоу ҳџьынџьуаа рааԥхьара", — иҳәеит Ахба.
Аминистр ихаҭыԥуаҩ ишазгәеиҭаз ала уахь инагахоит Аԥсны егьырҭ аус зыцнауа аиҿкаарақәагьы.
Москватәи Жәларбжьаратәи ацәыргақәҵа "Путешествия и туризм" иреиҳаӡоу атуризм азы ацәыргақәҵақәа ируакуп, жәларбжьаратә еилазаараҟны ҳаҭыр аманы иахәаԥшуеит. Иара мҩаԥысуеит 1994 шықәса раахыс. MITT шьоуп Урыстәыла атуристтә индустриаҿы ихҭыс дуны. Есышықәса иара еизнагоит адунеи зегь аҟынтәи атуристтә бизнес ахаҭарнакцәа. Урҭ ара иӡырыргоит рыпрограмма ҿыцқәа, рхырхарҭа ҿыцқәа.
