АҞӘА, ажьырныҳәа 30 – Sputnik, Бадри Есиава. Ажьырныҳәа 28 — 29 ауха Аԥсны иалагеит асоура. Асиноптикцәа ишырҳәо ала асеиԥш аҭагылазаашьа аҽа мшқәак иаанхоит. Абри инадҳәаланы аҳҭнықалақь акоммуналтә маҵзурақәа рҽырхианы иҟоуп. Макьаназы машәыр ҟамлац иҳәеит Sputnik акорреспондент дзыҿцәажәоз Акоммуналтә усбарҭа аиҳабы Дмитри Аҳәба.
"Иҷаԥшьоу акоммуналтә маҵзуҩцәа азыхиоуп асоура иахҟьар зылшо аҭагылазаашьа ҷыдақәа раԥыхра", — иҳәеит иара.
Аусбарҭа аиҳабы иажәақәа рыла амҩатә маҵзурақәагьы амҩақәа ррыцқьаразы ихианы иҟоуп, аха макьаназы уи хымԥадатәим.
"Аҵлақәа каҳауам, амҩагьы уанысыртә иҟоуп", — иҳәеит Аҳәба.
Дмитри Аҳәба иазгәеиҭеит аҭагылазаашьа аҽшеиҭанаклак аусбарҭа амаҵзуҩцәа рнапынҵақәа нап шрыларкуа.
