АҞӘА, ажьырныҳәа 30 – Sputnik, Роберт Џьопуа. Ареспубликатә хәышәтәырҭа аҳақьым хада инапынҵақәа назыгӡо Аслан Берзениа ишҳаиҳәаз ала амшцәгьа иахҟьаны аӡәгьы машәыр ихьны ахәышәтәырахь дымнеицт.
"Иацы, иахьа џьара ибаргәым аахак акәымзар аӡәгьы машәыр ихьны дҳадымҵаалацт. Аҳақьымцәа русура ишаҿыц иаҿуп", — иҳәеит Берзениа.
Ақалақьтә хәышәтәырҭа ахирург Алхас Аџьынџьал иажәақәа рыла асоура иахҟьаны абри ахәышәтәырҭахьгьы уаҩ дыдымҵаалацт.
"Иахәҭаны иҟалар аҳақьымцәа ацхыраара иазыхиоуп", — иҳәеит иара.
Ажьырныҳәа 28 — 29 рзы излагаз асоура иахьа шьыжьынӡа ихымкәаӡеит. Амҩақәа рҟны аныҟәара ԥкуп. Ашколқәеи ахәыҷбаҳчақәеи ашәахьаҽны аус руамызт.
