АҞӘА, ажьырныҳәа 30 – Sputnik, Бадри Есиава. ДРСУ атехника ахархәарала ацентртә трасса арыцқьара нап аланакит. Абри атәы ҳкорреспондент изеиҭерҳәеит Аҟәеи, Гәдоуҭеи, Гагреи рраионқәа ркоммуналтә усбарҭақәа рхадацәа.
"КамАЗ-қәа ҩба, агреидер ДРСУ аусуҩцәа Аҟәа инаркны Ешыра "анхәа лыбз" ҳәа иахьашьҭо аҭыԥ аҟынӡа арыцқьаратә усурақәа ирҿуп. Макьаназ аусураҿы проблема ыҟаӡам. Ари аҭыԥ аҿы асгьы рацәоуп узҳәом", — иҳәеит ДРСУ-3 аиҳабы Валериан Абыхәба.
ДРСУ-1 аиҳабы Олег Мықәба иажәақәа рыла Гәдоуҭа араион аҟны быжь-сантиметрак рҟынӡа асы шьҭоуп, уажәтәи аамҭазы еиҳа иахьшәарҭоу аҭыԥқәа рҟны аусурақәа цоит.
Гагра араион иахьаҵанакуа аусурақәа шцо атәы ҳзеиҭеиҳәеит ДРСУ-2 аиҳабы Лев Хагәыш. Иара иажәақәа рыла аусбарҭа абригада шьыжьы инаркны аусура иаҿуп, аҳәаа аҟынтәи Пицундатәи ахаҵәирҭаҿынӡа иаахьеит. Ари араион аҿы 10 сантиметрак рҟынӡа асы шьҭоуп.
Лев Хагәыш иазгәеиҭеит атехника шырзымхо, агреидер рымам аԥслымӡ рԥсаҟьага машьынагьы рымам. ДРСУ-2 аусуҩцәа напыламацара аԥслымӡ аԥсаҟьара иаҿуп.
