АҞӘА, жәабран 2 – Sputnik, Бадраҟ Аҩӡба. Афонд "Азҳара" афинанстә ҭагылазаашьа еиӷьхар иазыԥхьагәаҭахоит ахԥатәи ахәыҷи уи ишьҭанеиуа ахәыҷқәеи рзы ҩышә-нызқь мааҭ аԥара ашәар лҳәеит аинтервиуа ҳаҭо Абиуџьетнҭыҵтәи агәыҳалалратә фонд "Азҳара" ацшьаҭаркҩы Луиза Ҭарԥҳа.
"Есымзатәи ацхыраагӡа атәы уҳәозар иаҳгәиҭоуп хнызқьмааҭ ракәымкәа хәнызқьмааҭ рызшәара. Агәыӷра ҳамоуп ҳфинанстә ҭагылазаашьа маншәалахап ҳәа усеиԥш ҳалшаразы", — лҳәеит лара.
Афонд "Азҳара" аусура аԥхьатәи аамҭазы аҳәынҭқарратә цхыраара аҭахоит лҳәеит Ҭарԥҳа.
"Иазыԥхьагәаҭоуп ареспубликатә биуџьет аҟынтәи 30 миллион мааҭ ҳаҭара. Наҟ-наҟ ацхыраара ҳаулоит агәыҳалалратә шьаҭала", — лҳәеит лара.
Луиза Ҭарԥҳа илҳәеит раԥхьатәи алагала Апарламент адепутатцәа иҟарҵеит ҳәа. Урҭ мызктәи рулафахәқәа афонд иахырыԥхьаӡалеит. Иара убасгьы ацхыраара рухьеит Гагра араион Ахадара, Риҵатәи амилаҭтә парк.
Аԥара рызшәахалоит аԥсуа ҭаацәарақәа 2017 шықәса ажьырныҳәа 1 инаркны.
Есымзатәи ацхыраагӡа аиуразы афонд ахь арзаҳал нашьҭтәуп, ахәыҷқәа рираз аршаҳаҭгақәеи, аҭаацәа ртәылауаҩшәҟәқәеи, иахьынхо аҭыԥ аҟынтәи адырранҵеи ацҵаны.
Раԥхьатәи аԥсуа ҭаацәарақәа фба 2017 шықәса ажьырныҳәа 27 рзы ироуит раԥхьатәи ашәарақәа.
