АҞӘА, жәабран 8 – Sputnik, Бадраҟ Аҩӡба. 80% рҟынӡа алхырҭатә ҭыԥқәа хианы иҟоуп иҳәеит Ацентртә алхратә комиссиа ахантәаҩы Ҭамаз Гәагьиа.
"Ишьақәыргылоуп алхырҭатә ҭыԥқәа рҟны акабинақәа рыҟазаашьа, иаԥҵоуп дарбанызаалак абжьыҭиҩы маӡала ибжьы иҭирц азы аҭагылазаашьа маншәалақәа. Маӡала абжьыҭира зегьы еицырзеиԥшу ҭагылазаашьоуп", — иҳәеит Гәагьиа.
Аԥсны ахы-аҵыхәа 152 алхырҭатә ҭыԥқәа еиҿкаауп.
Гәагьиа иажәақәа рыла атәылауаҩ ибжьы шиҭиз азы уаанӡа апаспорт аҟны иҟарҵоз адырга сынтәа иаԥыхуп.
"Жәларбжьаратәи аҟазшьа змоу апаспортқәа Аԥсны ауааԥсыра ираҳҭоит. Урҭ рҟны иарбанызаалак дыргак анҵара иашахом, иҟалом. Иаанхо амаркерқәа роуп", — иҳәеит иара.
Алхрақәа мҩаԥысраны иҟоуп хәажәкыра 12 2017 шықәса рзы. Дара мҩаԥысуеит Аԥсны иахьаҵанакуа иаартхо 35 округ рҟны.
