АҞӘА, жәабран 8 – Sputnik, Бадраҟ Аҩӡба. Аҟәа ақалақь Ахада ихаҭыԥуаҩ Леила Ӡыба иаҳзеиҭалҳәеит аҳҭнықалақь ашколқәа рзы ишымҩаԥгахо апрограмма "Мой выбор — здоровье". Ашколқәа зегьы медицинатә кабинетла еиқәыршәахоит лҳәеит ҳкорреспондент дзыҿцәажәоз Леила Ӡыба.
"Ақалақь Ахада идҵала ашколқәа медицинатә кабинетла еиқәыршәахоит, иахәҭоу амыругақәагьы рзыргылахоит. Асеиԥш акабинетқәа ашколқәа рҟны ианыҟаз аибашьра ҟалаанӡа акәын", — лҳәеит лара.
Ӡыба иара убасгьы иазгәалҭеит аҳҭнықалақь ашколқәа рҟны ишымҩаԥгахо апрограмма "Мой выбор — здоровье".
"Ари, Аҟәа ақаалақь Ахадара Агәабзиарахьчара аусбарҭеи Аҵара аусбарҭеи еицеиҿыркааз программоуп. Апрограмма иадыԥхьахалахоит Аҟәатәи анаркологиатә диспансер аусуҩцәа. Урҭ алекциақәа мҩаԥыргалоит", — лҳәеит лара.
Леила Ӡыба дазааҭгылан илҳәеит ақалақь Ахадара азхьаԥшра ду шарҭо аспорт.
"Иахьа аилатәара ҳаман. Ақалақь Ахада иҳәеит ашколқәа рҟны аспорттә залқәа аремонт рзура шхацыркхо", — лҳәеит лара.
Аҟәа иҟоуп 15, быжь-нызқьи бжаки ҵаҩы аҵара ахьырҵо.