АҞӘА, жәабран 9 – Sputnik. Гагра, Пицунда иахьырзааигәоу аԥсыӡкыгатә ӷбақәа ргәаҭара мҩаԥыргеит Урыстәыла Афедералтә шәарҭадаратә маҵзура, Аԥсны Аҳәынҭқарратә шәарҭадаратә маҵзура, Аԥсны аекологиазы аҳәынҭқарратә Еилакы русзуҩцәа. Ареид аан аҭырқәа ӷбақәа ҩба Аԥсны амшын акваториа иахьаҵанакуа закәандарыла аԥсыӡ ркуан ҳәа арбоуп апресс-маҵзура апресс-релиз аҟны.
Адокумент аҟны ишаҳәо ала Ҭырқәтәылатәи аԥсыӡкыга ӷбақәа "Акерко-1" "Бафрали-3" азин ахьыҟамыз аҭыԥ аҟны аԥсыӡ ркуан. "Акерко-1" акаԥдан агәҽанҵара иҭан, "Бафрали-3" акаԥдан Аԥсны аекологиазы аҳәынҭеилакы имҩаԥнаго аилыргарақәа хыркәшахаанӡа аԥсыӡкра азин имхын.
Урыстәыла Афедералтә шәарҭадаратә маҵзура, Аԥсны Аҳәынҭқарратә шәарҭадаратә маҵзура, Аԥсны аекологиазы аҳәынҭқарратә Еилакы 2009 шықәса рзы Аԥсни Урыстәылеи Рхадацәа рнапы зҵарҩыз "Аԥсны Аҳәынҭқарра аҳәынҭқарратә ҳәаа ахьчараҟны азеиԥш ҽазышәарақәа рзы Аиқәшаҳаҭра" анагӡаразы ареидқәа еицымҩаԥыргоит.
