Бганба: адепутатцәа рыламкьысра азин иамоуп ахатә ҵаҵӷәы

© Sputnik / Томас ТхайцукАпарламент.
Апарламент. - Sputnik Аҧсны
Анапаҵаҩра
НовостиTelegram
Апарламент ахь инарышьҭит атәылауаа рнапы зҵаҩу азыҳәа – Апарламент адепутатцәа ирымоу аԥыжәарақәа рыркьаҿразы.

АҞӘА, жәабран 9 – Sputnik, Роберт Џьопуа. Аԥшьаша, жәабран 9 рзы имҩаԥгаз апресс-конференциаҟны Аԥсны Жәлар Реизара – Апарламент аиҳабы Валери Бганба иҳәеит, Апарламент адепутатцәа рыламкьысраҳәа иҟоу аԥыжәара рхыхра сақәшаҳаҭым ҳәа.

"Адепутатцәа рыламкьысра азин иамоуп ахатә ҵаҵӷәы. Уи иаанагоит адепутат дымшәа-дмырҳа игәы иаанаго иҳәалароуп ҳәа. 25 шықәса раахыс депутат заҵәык азакәан еилеигеит. Уи иаанагом егьырҭ зегьы ахара рыдҵатәуп ҳәа", — иҳәеит Бганба.

Атәылауаа иҟарҵаз азыҳәа ахҳәаа аҭо Апарламент аиҳабы иҳәеит алхрахь инеиуа иқәра 35 шықәса еиҵамзароуп ҳәа иҳәо дшадгыло.

Валери Бганба, аԥшьаша, жәабран 9 рзы имҩаԥигаз апресс-конференциа - Sputnik Аҧсны
Апарламент аҿы хәышықәса рыла 286 закәан рыдыркылеит

"Сара садгылоит алхрахь инеиуа иқәра 35 шықәса еиҵамзароуп ҳәа иҳәо, аха Аконституциаҟны иарбоуп 25 шықәса зхыҵыз адепутатрахь кандидатс ихы ықәиргылар ҟалоит ҳәа. Ҳара азин ҳамам Аконституциа иану аилагара", ҳәа азгәеиҭеит Бганба.

Адепутат Апарламент аҟны иҟазаара ҩ-ҿҳәарак иреиҳамхароуп ҳәа азыҳәаҿ иарбоу аганахь алагьы Бганба адгылара ҟаиҵом.

"Аиҳарак анагӡаратә мчрақәа роуп зыҿҳәара ԥыркуа. Зажәеи зуси еимадоу, здырра ҳараку Апарламент аҟны аус иуазар – уи узеигәырӷьаша акоуп", — иҳәеит иара.

Апарламент аппарат аиҳабы Вадим Бжьаниа иҳәеит жәабран 6 рзы Апарламент ахь ишынашьҭыз ҳтәылауаа ргәыԥк рнапы зҵарҩыз азыҳәа. Иара наҟ-наҟ аус адуларазы ашәҟәы иҭаҩны ирыдыркылеит.

"Аӡбра ҳадаҳкылеит адокумент апрофильтә еилакы ахь инаҳашьҭырц, аусутә гәыԥ аԥҵаны уа иарбоу ажәалагалақәа рыҭҵааразы", — иҳәеит Бжьаниа.

Ашәҟәы рнапы аҵарҩит 400-ҩык рҟынӡа Аԥсны атәылауаа.

Ажәабжьқәа зегьы
0