АҞӘА, жәабран 13 – Sputnik. Аԥсуа бызшәа аҿиара Афонд аӡәгьы иаԥимхӡеит, иара аиҭеиҿкаараоуп изхысуа ҳәа лҳәеит Аилак ахантәаҩы ихаҭыԥуаҩ Ҭамила Арышԥҳа. Аминистрцәа Реилазаара Ақәҵарала 2017 шықәса ажьырныҳәа 1 инаркны аԥсуа бызшәа аҿиара Аҳәынҭқарратә фонд ҿыц еиҿкаау абызшәатә политиказы Аҳәынҭқарратә еилакы иадҵахоит.
Ҭамила Арышԥҳа лажәақәа рыла уажәы, абызшәатә политика аҿиара уаанӡатәи Афонд аусуҩцәа напынҵаны ирымоу аусура ахаҭабзиара агәаҭароуп.
"Аҳәынҭеилакы шьақәгылоуп абарҭ аҟәшақәа рыла: Гәында Кәыҵниаԥҳа напхгара алҭоит ахәыҷтәы литература аҟәша, Гәында Сақаниаԥҳа напхгара алҭоит аиҭагара аҟәша, аԥсуа бызшәа арҵара аҟәша напхгара алҭоит Диана Шамԥҳа. Аилак аусуҩцәа рыштаттә ак иартәоит 23-ҩык аусуҩцәа, урҭ рҟынтәи жәаҩык уаанӡатәи Афонд аусуҩцәа роуп", — лҳәоит Арышԥҳа.
Иара убри аан лара иазгәалҭеит Афонд акыр хра змаз аусура шымҩаԥнагоз.
"Аха, аԥсуа жәлар ргәаанагарала абызшәа аҿиаразы имҩаԥго аусура азхо иҟам, ҳаззыԥшыз алҵшәақәа аанашьҭуам. Аҳәынҭқарра хылаԥшра анаҭалароуп абри апроцесс. Иара убасгьы аԥсуа бызшәа аҿиаразы апрограмма ззырхаз адҵақәа зегь нагӡамхеит. Убри азы Аилак аҿаԥхьа идҵа хаданы иқәгыло Афонд имҩаԥнагоз аусура еиҳа хра аманы аҟаҵареи хаҭабзиарала аиӷьтәреи роуп", — лҳәеит Арышԥҳа.
Лара лажәақәа рыла апроектқәа зегьы аҳәынҭқарра хылаԥшра рнаҭалароуп.
"Убри инадҳәаланы аҳәынҭқарратә бызшәазы аҳәынҭқарратә комиссиа ахәаԥшны ишьақәнарӷәӷәаанӡа апроектқәа зегьы аамҭала иаанкылоуп", ҳәа азгәалҭеит Ҭамила Арышԥҳа.
2001 шықәса рзы Аԥсны раԥхьатәи Ахада Владислав Арӡынба идҵала иаԥҵан аԥсуа бызшәа аҿиаразы Аҳәынҭқарратә фонд.
2001 — 2003 шықәсқәа рзы Афонд напхгара алҭон Ҭали Џьапуаԥҳа, нас – Арда Ашәба. 2005 шықәса раахыс Афонд дахагылан Гәында Кәыҵниаԥҳа. Аԥсуа бызшәа аҿиаразы Аҳәынҭқарратә Фонд аԥсуа бызшәазы аметодикатә литература азырхиареи аҭыжьреи, ахәыҷтәы сахьаркыратә литературеи ажәарқәеи разырхиареи рҭыжьреи мҩаԥнагон. Азхьаԥшра ду анаҭон аҳәаанырцәтәи аԥсуа диаспора аԥсшәа дырҵара аметодика, иазыҟарҵон урҭ аҵара дзырҵаша. Раԥхьаӡа акәны Афонд амчала иҭыжьын аҭырқәа-аԥсуа жәар.
