АҞӘА, жәабран 14 – Sputnik, Роберт Џьопуа. Атәылаҟҟны аинвестициатә ҭагылазаашьа еиӷьхароуп иҳәеит Аԥсны Аинвестмаҵзура адиректор Алмас Ҭаниа, Аԥсны Аекономика аминистрреи анаплакыҩцәа реидгыла "Деловая Россиеи" рнапы зҵарҩыз Амеморандум аихшьаалақәа аҭо.
"Аидгыла апрезидент Алексеи Репик иазгәеиҭеит ҳреспублика егьырҭ ареспубликақәа ирҿырԥшны иамоу аԥыжәарақәа. Ҳара иаҳуалуп ҳаамҭазтәи атенденциақәа аҽрықәыршәара", — иҳәеит Ҭаниа Sputnik акорреспондент даниҿцәажәоз.
Иара иажәақәа рыла аидгыла алахәылацәак иҟарҵахьан аҽазышәара Аԥсны абизнес аартразы, аха аԥынгылақәа маҷымкәа ироуит.
"Асеиԥш иҟоу аҭагылазаашьақәа ҳҽырцәыҳахьчароуп. Убри ауп Аинвестициатә маҵзура аԥҵара зыхҟьазгьы. Ҳара иаҳҭахуп аинвестициатә усура асистематә ҟазшьа аҭара", — иҳәеит Ҭаниа.
Аԥсны Аекономика аминистрреи анаплакыҩцәа реидгыла "Деловая Россиеи" аинырразы Амеморандум рнапы аҵарҩит жәабран 9 рзы Москва.
