АҞӘА, жәабран 15 – Sputnik, Роберт Џьопуа. Амультимедиатә информациатә центр Sputnik Аԥсны жәабран 15 рзы ихацнаркит аԥсышәалеи урыс бызшәалеи арадиодырраҭарақәа.
Sputnik Аԥсны анапхгаҩы Руслан Бганба иазгәеиҭеит арадио Sputnik Аԥсны иахьазы ареспубликаҟны иуникалу аформат змоу информациа-аналитикатә радиоуп ҳәа.
"Арадио Sputnik Аԥсны ацәырҵра инадҳәаланы ҳмультимедиатә центр атехнологиатәи арҿиара-еиҿкааратәи ҟазшьеи рыла иаднакылеит аӡбра арадио ажәабжь-аналитикатә хырхарҭа аиуеит ҳәа", — иҳәеит Бганба.
Аинформациатә маҵзура ашеф-редактор Дмитри Нездоровин иажәақәа рыла уажәшьҭа Sputnik Аԥсны ихарҭәаау медиакомплексуп.
"Ҳзыӡырыҩцәа ирыдаагало арадиоаалыҵ аԥҵоуп ҳхатәы рҿиаратәи ҳхатәы техникатәи ресурсқәа рыла. Ҳжурналистцәа ироуеит алшара апортал азы аҩра адагьы аудиториа ҳтәылаҿ иҟало ажәабжьқәа рзеиҭаҳәара, рацәажәара. Ҳара аус рыдулара мҩаԥаагараны иҟоуп апроект ҿыцқәа. Астудиахь иааҳаԥхьалоит атәылаҿ еицырдыруа ауаа", — иҳәеит Нездоровин.
Арадио апродиусер Елена Бекрениова иазгәалҭеит абри аус акраамҭатәи аҽазыҟаҵарақәа шацыз.
"Ҳара иааҳаԥхьахьеит еицырдыруа ашәҟәыҩҩцәа, аполитикцәа, ауаажәларратә усзуҩцәа. Аинтерес зҵаз аиҿцәажәарақәа мҩаԥаагеит Семеном Григорьев, Муҳамед Кьылба, Авангард Леонтьиев, Сергеи Никоненко уҳәа рԥылараан", — лҳәеит Бекрениова.
Аҟәа ақалақьи, Аҟәеи Гәылрыԥшьи араионқәа рҟны Sputnik Аԥсны азыӡырыҩра алшоит FM-адиапазон 103,2-тәи алассы-лассраҟны. Очамчыра, Тҟәарчал, Гал араионқәа рҟны– 100,7 FM. Гәдоуҭатәи араион аҟны– 105,2 FM. Гагра араион аҟны — 101,3 FM.
Ажәабжьқәеи апрограммақәеи рҭыжьра мҩаԥысуеит: 8:00, 13:00, 18:00, 21:00 сааҭ рзы.
