АҞӘА, жәабран 15 – Sputnik, Бадраҟ Аҩӡба. Аԥҳәыс дахьықәгылоу алхратә ҭыԥ аҟны хҩы-ԥшьҩы ахацәа анықәгылалак уи Апарлмент ахь анеира лцәыуадаҩхоит, лҳәеит Аԥсны Жәлар Реизара адепутат.
Гамсаниаԥҳа ишазгәалҭо ала, аԥҳәыс Апарламент аҟны илыӡбаша азҵаарақәа даара ирацәоуп, асоциалтә проблемақәа, адемографиа иаҵанакуа азҵаарақәа уҳәа ирацәаны.
Уи излалҳәаз ала, Апарламент ахь алхрақәа рхы аладмырхәит акыр аҵареи аԥышәеи змоу аҳәсақәа.
"Издаҳгалаз ҟалеит, аха уажәы сазхиам, мамзаргьы ариаҟара ауаа ахьықәгылоу уеиазгьы сзаиааиуам зҳәаз ҟалеит", — лҳәеит лара.
Ареспублика ахадареи, еиуеиԥшым аусбарҭақәеи агендертә еиҟарара азы азакәан рхы иадырхәом, абри аҩыза агәаанагара лымоуп Гамсаниаԥҳа. Азакәан даара ибзиоуп, европатәи астандартқәа ирықәшәоит, аха алкаақәа ҟаҳцозар иаҳбаратәы иҟоуп ахәҭаҷқәа зегьы аус шырымуа, лҳәеит уи.
Емма Гамсаниаԥҳа лгәаанагарала, зҵареи здырреи ыҟоу аԥҳәыс Апарламент аҿоума, мамзаргьы иарбанызаалак анапхгаратә ҭыԥқәа рҟны аума, акыр дхәарҭоуп.
