АҞӘА, жәабран 17 – Sputnik, Бадри Есиава. Жәабран 16 рзы Аԥсны Ахада имҩаԥигаз аилатәараҟны иҳәеит ареспублика амҩадуқәа рҟны ареагентқәа рхархәара иалагазар ҟалоит ҳәа. Абри далацәажәо аҳәынҭеилакы "Аԥсныавтомҩа" адиректор хада Борис Ачба иҳәеит ареспубликахь ареагентқәа раагара азҵаара заацәоуп, иахьазы уалацәажәартәгьы иҟаӡам ҳәа.
"Ареагентқәа рыӡбахә алацәажәара заауп. Урҭ арахь раагаразы аекологцәа аҭҵаарақәа мҩаԥыргароуп. Иара уигьы иахьа-уаҵәы иҟалаша акакәым, насгьы ареагентқәа рхархәара аԥара маҷымкәа изҭаху усуп", — иҳәеит Ачба.
Борис Ачба иазгәеиҭеит хаҭала иара ари атема арҿиара рацәак дышзадымгыло.
"Еиҳа еиӷьуп иахәҭаны иҟоу атехника ааҳхәар. Иахьатәи аамҭазы даара иаҳныԥшуеит атехника амамзаара", — иҳәеит адиректор хада.
Иар убасгьы далацәажәеит иахьатәи аамҭазы амҩақәа ирнырԥсало аԥслымӡ аӡбахәгьы. Иара игәаанагарала уи аметодгьы иамоуп агхақәа, избанзар аԥслымӡ асы шықәҵыз еиԥш амҩа аҭҳәаақәа амырҭәырц азы амҩа ианыгатәуп. Уи ҟазҵо атехника ҷыдазгьы акыр ҳмаџьаноуп ҳәа азгәеиҭеит иара.
Аԥсны Ахада Идҵала еиҿкаау аоперативтә штаб акәзар аусура иаҿып. Асоура акәзар макьаназы иԥкым, аиҳаракгьы ареспублика мрагыларатәи ахәҭахьы.
