АҞӘА, жәабран 17– Sputnik, Бадри Есиава. Жәабран 16 — 17 рзы аҳауа ахьшәашәара иахҟьаны ацентртә трасса амҩахәҭақәак рҟны иқәҵааит. Даара амаршәа кны иныҟәалатәуп иҳәеит Аԥсны Аҳәынҭавтоинспекциа аиҳабы Наур Смыр.
"Аԥсны мраҭашәаратәи аган ахь амҩақәа зегьы рыцқьоуп, аха иаха ишаанӡа мрагыларатәи Аԥсны ахәҭахьы асы леиуан. Уахьтәи аган аҿы амҩақәа рыцқьаӡам. Ҳәарада аныҟәара ҟалоит, аха иаха иара убасгьы иҵааит, даара ашьшьыҳәа иныҟәалатәуп машәыр ҟамларц азы", — иҳәеит Смыр.
Ареспублика мрагыларатәи ахәҭаҿы иаха имҵааит аха асы леиуан, иахьа амра ԥхеит. Ус анакәха уаха хымԥада иқәҵаауеит. Уи аныҟәара аруадаҩышт ҳәа азгәеиҭеит Смыр.
Атәыла Ахада Идҵала еиҿкаау аоперативтә штаб аусура иацнаҵоит.
