АҞӘА, жәабран 23 – Sputnik, Бадри Есиава. Иааиԥмырҟьаӡакәа ООН аҟны Урыстәыла Ахаҭарнакс иҟаз Витали Чуркин иԥсра адунеитә дипломатиа зегьы азы ицәыӡ дууп, иара еснагь Аԥсныи Аахыҵ Уаԥстәылеи ринтересқәа ихьчон, ҳәа ҳкорреспондент изеиҭеиҳәеит Аԥсны Адәныҟатәи аусқәа уаанӡатәи рминистр Максим Ӷәынџьиа.
"Витали Чуркин ибзианы еиликаауан Аԥсныи Аахыҵ Уаԥстәылеи рпроблемақәа, ишилшоз ала ООН атрибунаҟынтәи урҭ ринтересқәа рыхьчара иҽазишәон. Еснагь аиаша дадгылон", ҳәа азгәеиҭеит Максим Ӷәынџьиа.
Иара иажәақәа рыла Чуркин иаппонентцәагьы ирымҳәар рылшом ипрофессионалтә ҟазара аҳаракыра ду шамаз, ирымҳәар рылшом ажәа ԥхақәа.
Максим Ӷәынџьиа иҳәеит Чуркин иԥсра ааха дуны ишыҟоу адунеитә дипломатиа зегьы азы.
Витали Чуркин иааиԥмырҟьаӡакәа ООН аҟни ООН Ашәарҭадаратә хеилак аҟни Урыстәыла Ахаҭарнакс дыҟан 2006 шықәса мшаԥымза 8 инаркны.
