Sputnik, Владимир Бегунов
Аамҭақәак рзы ателецентр "Останкино" аҟны инеимда-ааимдо ирҳәон анекдот — Амазонка абнаршәыраҿ ирбеит Иури Сенкевич ахааназ дзымбацыз аҵыс ҳәа. Убриаҟара Иури Сенкевич ихьӡ рылаҵәан, адунеи хәыц-хәыц еимидахьан. Иури Сенкевич диижьҭеит ԥшьынҩажәа шықәса ҵуеит иахьа. Иара апапирустә шхәала Тур Хеиердал дицны Атлантикатәи аокеан аҟынтәи Индиатәи аокеан ала ажәытә мшынннныҟәаҩцәа рымҩа данысхьан, дхалахьан ашьха Еверест, апланета аполиусқәа рыҩбагь дрызнеихьан.
СССР Аҳәынҭқарратә премиа Иури Сенкевич ианашьан Антарктида имҩаԥигаз аҭҵаарақәа рзы.
Ԥшьынҩажәижәабатәи ашықәсқәа раан Иури Сенкевич иҭихит адокументалтә фильм "Иқьырсиантәылоу Аԥсны". Иара дырбан "Аныҟәаҩцәа рклуб" аҟны.
Афильм аҟны аҭыԥ амоуп Аԥсны раԥхьатәи Ахада Владислав Арӡынба иинтервиу, Аԥсуа уахәама ахада аб Виссарион (Аԥлиа) иинтервиу.
1999 шықәса рзы иҭихыз ари афильм Аԥсны ахьӡ аҽакала адкылара иацхрааит. Маҷ-маҷ иара ахьӡ аибашьра адкылара мацара адагьы аҭоурыхтәи акультуратәи ҭынха ду змоу атәыла акәны иахәаԥшуа иалагеит.
"Сара сгәы иаанагомызт Сенкевич абриаҟара иаабац уаҩны дыҟоуп, аханатә ҳаибадыруазшәа, — иҳәеит Аԥсны Ахада иабжьгаҩ Владимир Занҭариа, — афильм аҭыхраан акыр ҳаиҿцәажәон. Аԥсны оумашәа ибон".
Аҭыхрақәа рышьҭахь Владислав Григори-иԥеи Иури Сенкевичи ашумерцәеи ажәытә цивилизациақәеи ирылацәажәон.
Аԥсуа уахәама аиереа аб Виссарион (Аԥлиаа) афильм далахәын.
Иара еиҭеиҳәеит Новодевичие аԥсыжырҭаҿы, Иури Сенкевич инышәынҭра дшаҭаахьо, уаҟа иара иԥсы аҭынчхаразы Анцәа дышиҳәахьо.
Иури Сенкевич иԥсҭазаара далҵит цәыббра 25 2003 шықәса рзы, Москва.
