АҞӘА, хәажәкыра 7 – Sputnik, Владимир Бегунов. Аԥсны Акультура аминистрра апрокуратурахь аҳәара ҟанаҵеит аилыргара цонаҵы аҭоурых ҟазшьа змоу ахыбра ақәгара аанкылахарц. Абри атәы иҳәеит Аԥсны Акультуреи аҭоурых-культуратә ҭынха ахьчареи рминистрра аҟазауаҩ Инал Џьопуа.
"Иацы, аусура амш анҵәамҭазы аусурақәа рнапхгаҩы адокументқәа рпакет ҳзааигеит. Ҳара уи аекспертизазы азиндырратә ҟәшахьы инаҳашьҭит. Уажәазы аҵакы заҳҭо аргылара ақәгара аанкылароуп. Аусуҩцәа русура хацыдмыркырц азы шьыжьнаҵы уахь инеиуеит апрокуратура аусзуҩцәа", — иҳәеит иара.
Аҽыкәабарҭақәа "Стамбул" ргылан 1913 шықәса рзы. Иргылеит архитектор Альфред Бамме.
Ԥхынҷкәын 29 2015 шықәса рзы иара аҳәынҭқарратә реестр ахь иаҵаркхеит.
Аусурақәа рнапхгаҩы иҳәоит, шықәсқәак раԥхьа архитектртә гәаҭара ашьҭахь ахыбра аиҭашьақәыргылара алшом ҳәа ишышьақәырӷәӷәаз.
Иара убасгьы иазгәеиҭоит Сергеи Багаԥшь атәыла Ахадас даныҟаз аамҭақәа раахыс ишимоу анапы зҵаҩу адокументқәа. Урҭ рҟны иарбоуп аҽыкәабарҭа ахыбра аҭоурых-культуратә ҭынха ареестр иалгоуп ҳәа.
Акультура аминистрраҟны акәзар, ирҳәоит 2015 шықәса рзы атәыла Ахада Рауль Ҳаџьымба инапы зҵеиҩыз ареестр аҟны ахыбра ҭоурых-культуратә ҭынхоуп ҳәа ишарбоу.
