АҞӘА, хәажәкыра 7 – Sputnik, Роберт Џьопуа. Аҳәынҭбиуџьет ахатәы лагалақәа аизҳара ишаҿу умбарц алшом, иҳәеит инарҭбаау Аминистрцәа Реилазаара аилатәараҟны Аԥсны Ахада Рауль Ҳаџьымба.
"Аҵыхәтәантәи аҩышықәса рзы аҳәынҭқарратә биуџьет ахатәы лагалақәа рыцлара иаҿуп. Ари адинамика ԥхьаҟагьы имҩаԥыслоит. Уи азы иахьазы аус зуа ашәахқәҵара асистема аԥсахрақәа аҭаххоит, абиуџьет еиҿкаарагьы ареформақәа аҭахны иҟоуп", — иҳәеит Ҳаџьымба.
Атәыла Ахада иазиԥхьаӡоит атәыла афинанстәии аекономикатәии лшарақәа анырра арҭеит акризистәи асанкциатәи процессқәа ҳәа.
Иара иажәақәа рыла асоциал ҵак змоу ахыдҵақәа ианаамҭо рынагӡарагьы ауадаҩрақәа рыцын.
"Ауадаҩрақәа ыҟан. Уи аӡәгьы мап ацәикӡом. Аха урҭ ахыдҵақәа, аамҭа аҽҭагӡара алымшазаргьы, инагӡан. Уи зегьы атарифқәеи ашәахтәқәеи ирыцымҵакәа. Ауадаҩрақәа риааира ҳалыршаны ҳпозициақәа ҳарӷәӷәеит", — иҳәеит Ҳаџьымба.
Аҽазышәарақәа зегьы азырхазароуп абизнес маҷи, абжьаратә бизнеси, абизнес дуи рзы аҭагылазаашьа маншәалақәа раԥҵара, иара убасгьы административтә ԥынгылақәа рыркьаҿра ҳәа дцәажәоит атәыла Ахада.
Рауль Ҳаџьымба ашәахтәқәа дрылацәажәо иҳәеит аҳәынҭқарра 243 миллион мааҭ рҟынӡа шамоуз. Атәыла аиҳабыра, иара игәаанагарала имҩаԥнагароуп аусура ҭбаа асеиԥш иҟоу ауалқәа рыҟазаара мзызс иамоу аилкааразы. Абри азҵаара аганахь ала иарбанызаалак гәшаҭарак ыҟамзароуп ҳәа ишьоит Ҳаџьымба.
