Аиҭагаҩцәа-асинхронистцәа разыҟаҵара хәарҭа змоу усуп, избан акәзар макьана профессионалла иазыҟаҵоу аиҭагаҩцәа ҳамаӡам, абри атәы лҳәеит Аҳәынҭқарратә бызшәатә политиказы Аҳәынҭқарратә еилакы ахантәаҩы иҳаҭыԥуаҩ Ҭамила Арышԥҳа.
"Аԥснытәи аҳәынҭқарратә университет астудентцәа хә-ҩык Будапешт имҩаԥысуаз арҵаратә-аиҭагаратә семинарқәа ирылахәын. Ари апроект хықәкыс иамоуп аиҭагаҩцәа разыҟаҵара. Аха ус баша аиҭагаҩцәа ракәымкәа, аиҭагаҩцәа –асинхронистцәа. Уи аҟынтә ари апроект иаҳҭахыз хәарҭара злоу проектуп", — ҳәа лҳәеит Ҭамила Арышԥҳа.
Аҳәынҭқарратә бызшәатә политиказы Аҳәынҭқарратә еилакы ахантәаҩы иҳаҭыԥуаҩ лажәақәа рыла, ас еиԥш асеминарқәа астудентцәа ахысхьан ҩынтә.
Аиҭагаҩцәа-асинхронистцәа разыҟаҵаразы апроект еиҿнакаауеит "Европа аилак". Ари апроект Аԥсны наԥхгаҩыс дамоуп Агуманитартә зҵаарақәа рзы Жәларбжьаратәи аимадарақәа ирызку амчнаӡа змоу Аԥсны аҳәынҭқаррра ахада ихаҭарнак Зураб Лакербаиа.
