АҞӘА, хәажәкыра 24 — Sputnik. Аҩадатәи Кореиа ихнаркәшеит аиадертә ԥышәарақәа рҽазыҟаҵара ҳәа аанацҳауеит РИА Новости, амаҵзура Ренхап адырраҭарақәа ҵаҵӷәыс иҟаҵаны.
"Ҳара ҳахәшьарақәа рыла Аҩадатәи Кореиа азыхиоуп Ким Чен Ын идҵа ашьҭахь сааҭқәак рыҩныҵҟала аиадертә ԥышәарақәа рымҩаԥгара", ҳәа арбоуп адырраҭараҟны.
Уаанӡа америкатәи аррамаҵзурауаа аҳәамҭа ҟарҵахьан Аҩадатәи Кореиа хәажәкырамза анҵәамҭазы аиадертә ԥышәара мҩаԥыргар рылшоит ҳәа. Дара ирҳәон аиадертә полигон Пунгери (апровинциа Хамгион-Пукто) ааигәара атоннель ажра хдыркәшеит ҳәа.
2016 шықәса рзы Аҩадатәи Кореиа имҩаԥнагеит аиадертә ԥжәарақәа ҩба.
