АҞӘА, мшаԥымза 25 – Sputnik, Бадраҟ Аҩӡба. Апатырџьанқәа раарыхраан аҭырқәа технологиақәа зынӡагьы ахархәара рымам, адунеи зегьы аҟны рхы иадырхәо голландиатәии израильтәии атехнологиақәа роуп, иҳәеит арԥхарҭатә нхамҩа "Фруктис" азиндырыҩ Геннади Берулаа ауҭраҭыхқәа рааӡаҩцәа Рмилаҭтә еидгыла аиҳабы Сергеи Коралиов, Аԥсны Урыстәылаҟа Ҭырқәтәылатәи апатырџьанқәа нанашьҭуеит ҳәа иҟаиҵаз аҳәамҭа ахҳәаа аҭо.
"Адунеи зегьы аҟны рхы иадырхәо голландиатәии израильтәии атехнологиақәа роуп. Аҳәаа аалыҵ ахыгараан иахәҭоу амаҵзурақәа: аҳазалхратәи аҳәаахьчаратәи маҵзурақәа, аҳәынҭстандарт, акарантинтә маҵзура уҳәа хылаԥшра руеит. Уи адагьы сара еиҿыскааит Россельхоз ахаҭарнакцәа Аԥсныҟа раара, аҭыԥ аҟны анашеи апатырџьани шааҳрыхуа рылала ирбарц", — иҳәеит Берулаа.
Геннади Берулаа иазгәеиҭеит Аԥснытәии Ҭырқәтәылатәии апатырџьанқәа гьамалагьы ишеиԥшым, ԥшшәылагьы ишеиԥшым.
"Ҳара ҳпатырџьанқәа фҩылагьы иудыруеит, аԥшшәгьы амоуп. Ҳара ҳаалыҵ ҳаманы Краснодарҟа асанкциақәа ҟалаанӡа ҳцахьан. Аахәаҩцәа рхаҭақәагьы оумашәа ирбон рхаҭабзиара", — иҳәоит азиндырыҩ.
"Ҭырқәтәыла хыԥхьаӡарала аџьармыкьақәа ҭнарҭәаауеит, аха ахаҭабзиара рацәак иацклаԥшуам", ҳәа азгәеиҭоит Берулаа.
Аԥсны аҳазалхратә еилакы адыррақәа рыла 2014 шықәса рзы атәыла зынӡаскгьы иалгамызт абри ауҭраҭых, 2016 шықәса рзы — 2 167 тонна алыргеит, 2017 шықәса раԥхьатәи аԥшьымз рзы атәыла аҳәаа иахыгоуп 96 тонна апатырџьан.
