КӘТОЛ, лаҵарамза 2 — Sputnik, Амра Амҷԥҳа. Очамчыра араион Кәтол ақыҭан ааԥыни аџьеи рымшныҳәа Маи акы аҽны имҩаԥысит аҽыспорттә еиндаҭларақәа. Арахь иааиит ареспублика зегь аҟынтәи абри аспортхкы абзиабаҩцәа.
Аиндаҭларақәа ирылахәуп тамшьаа, кәтолаа, џьгьардаа. Арахь иааиит Гәдоуҭа, Аҟәа, Очамчыра рҟынтәи аспортсменцәа.
Аиндаҭларақәа рыԥхьахәтә фонд иартәоит 150 нызқь мааҭ.
"Еиндаҭлараны иҟоуп: 1000, 1200, 2000, 3000 и 5000 метра, — иҳәоит Очамчыра араион Ахада ихаҭыԥуаҩ Славик Қәчубериа. — Аҽы шьацқьақәа еиндаҭлоит".
Аԥсны жәлар Рџьынџьтәылатә еибашьра аветеран Оҭар Ачба, аҽы спорт аветернцәа Лордик Барганџьиа, Владимир Инал-иԥа Рыхраҿақәа рзы аицлабрақәа мҩаԥыргоит.
Еицырдыруа аҽааӡаҩ Беслан Абхазаа аҽырыҩраҿ иқәиргылеит иҽқәа хәба.
"Аԥсны еснагь аҽыспорт ахьӡ аман. Ажәытә анхаҩ бзиа иҽала дырдыруан. Иахьазы имаҷуп аҽааӡара знапы алаку, аха арахь иахьа ауаа рацәа рааира иуанаҳәоит аинтерес шмыӡыц", — иҳәоит иара.
Аԥсны Апарламент адепутат Илиа Гәниа аҽырыҩра иалаирхәит аҽыҩ Парфиумер.
"Иахьатәи аҽеиԥхныҩларақәа ныҳәамшны имҩаԥаагоит. Ирацәаҩуп арахь иаииз аҿар. Сара аҽыспорт милаҭ спортхкны иҟалар сҭахуп", — иҳәоит Гәниа.
Аиндаҭларақәа аартуа еизаз аԥсшәа реиҳәеит Кәтол ақыҭа Ахада Вахтанг Кәарацхьелиа. Аспортсменцәа ақәҿиарақәа рзеиӷьеишьеит.
Маи акы аныҳәа иаԥылоит 142 тәыла рҟны. Аԥсны акәзар абри амш аҽны имҩаԥыргоит аҽеиԥхныҩларақәа.
