Sputnik, Сырма Ашәԥҳа
Аԥсуа жәлар ҳҭоурых адаҟьақәа рҿы аԥсуа радио ахатә ҭыԥ аанакылоит, аҵак ду амоуп. 85 шықәса зхыҵуа аԥсуа радио, уажәшьҭа аԥсыуала иуҳәозар, абырграхь инеихьеит, аԥышәа дуӡӡа амоуп. Аԥсуа радио иахҭысхьоу даара ирацәоуп, ҳәа азгәеиҭоит Октаи Ҷкотуа.
"Сышьҭахьҟа схьаԥшны аҭоурых саназхәыцлак, аԥсуа милаҭтә қәԥара иахьабалак аԥсуа радио ахьалахәым хәҭак ыҟаӡам. Алахәра адагьы, аԥхьа игыланы изгоз амчрақәа иреиуан. Ҳхатәы бызшәала ҳцәажәар аныҟамлоз, аԥсышәала аҵара ҳанақәиҭмыз, ашколқәа зегьы аныхиаз, ҳажәлақәа анырыԥсахуаз, ҳажәлар анындырҵәоз, абарҭқәа зегьы ҳархымси. Абарҭ рызегьы иргәылҵны иааз ауп аԥсуа радио, ҳажәлар рҿахәы зҳәаз, рхьаа цәырызгаз, рыбжьы Аԥсны иқәыҩуа иҟазҵаз", — иҳәеит Ҷкотуа.
Иара изы аԥсуа радио аҵак дуӡӡа амоуп аҽакалагьы. Уажәы иаҳҳәозар, Ҭырқәтәыла инхо Џьенгиз Ашәба еиҭеиҳәоны иаҳахьеит, Самсун ианынхоз, Џьенгиз иаб, аҭаацәа зегьы еизганы, аԥсуа радио аефирахь ианцәырҵуаз аамҭазы рлымҳа кыдҵаны ишазыӡырҩуаз, алаӷырӡ шкарҭәоз.
Аԥсуа радио аефирахь ианцәырымҵлак, абжьы анырмаҳалак ишхьаауаз, даҽакала иуҳәозар ишџьабоз. Убри аҩыза аҭагылазаашьа рыман имаҷҩымкәа аҳәаанырцә инхоз аԥсуаа.
"Ҭырқәтәыла сара схаҭа санынхоз, санхәыҷыз, ианҳмаҳауаз аԥсуа радио абжьы. Даара ибзианы сахаануп арадио априомник анахь арахь иго иааго, ашьыжь шаанӡа, ахәылбыҽха уҳәа, уажә иҟамлар нас иҟалап ҳәа сааҭла ҳлымҳа кыдҵаны аԥсуа радио абжьы ҳанашьҭаз аамҭа ыҟан. Убриаҟара ҳаԥсадгьыл ахь иҳамаз агәыбылраҿы аԥсуа радио хымԥада ахәҭа алоуп ҳәа сгәы иаанагоит", — иҳәеит Октаи Ҷкотуа.
Ҳазҭагылоу аамҭазы, аԥсуа радио иахьабалак абжьы неиратәы алшара амоуп. Атехникатә хархәагақәа рыла акырӡа ԥхьаҟа ҳцеит. Аинтернет ала адунеи зегьы иахыҵәартә иҟоуп аԥсуа радио абжьы.
"Анцәа сиҳәоит, нас уи аҩыза алшара ҳамазар, адунеи иқәынхо аԥсуаа зегьы, аԥсуаа ҳадагьы егьырҭ амилаҭқәа зегьы ираҳаларц аԥсуа радио абжьы", — ҳәа иҳәеит Ҷкотуа.
Аибашьра анцоз аамҭазы аимадарақәа нырцәи аарцәи ирыбжьаз даара ихьысҳан, аҭелҵәҟьа узасӡомызт. Убри азы, аԥсуа радио даара ароль ӷәӷәа нанагӡеит аибашьра анцоз. Уаанӡагьы иалагахьан ари аус. Иԥсаҭа бзиахааит Иури Аргәын, ҳдиаспора ҳабжьы раҳааит ҳәа арадио иадҳәалаз аус даара дашьҭан, есымша дазҿлымҳан.
Аибашьра анцозгьы, аԥсуа радио аҟны аус зуаз, хаҭала ҳџьынџьуаа ирызкыз адырраҭара знапы ианыз Алина Ачԥҳа лакәын.
"Исгәалашәоит, Саим Аҩӡба, Гирбуз Аҭарба аредақациаҿы аус руан, саргьы зны-зынла аиҭагақәа ҟаҵаны ирысҭон. Убарҭ еиқәдыршәаз ажәабжьқәа рыла, Ҭырқәтәыла инхоз ауаа арадио иазыӡырҩны аинформациа рыман", — ҳа игәалаиршәоит Октаи Ҷкотуа.
Гәдоуҭантәи адырраҭара ҟарҵон, убас ауадаҩрақәа рхыргазаргьы ирулак аԥсуа жәлар ҳдиаспора рахь аинформациа рышьҭуан. Арадио амҽхак ҭбаан, амч ӷәӷәан. Арадио аефирахь ианцәырҵуаз аамҭа рдыруан, гәыԥ-гәыԥла рҽеизганы иазыӡырҩуан. Аԥсуа радио иабзоураны иҟалаз-ианылаз зегьы еилыркаауан.
Аԥсуа радио аиреи ашьақәгылареи зџьабаа аду, иахьа здунеи зыԥсаххьоу, тәанчара иҟоу, ҳазҭагылоу аамҭазы аус азызуа, аџьабаа адызбалахьоу зегьы, иара хаҭала идыруеит азы акыр шықәса аԥсуа радио амаҵ азызухьо Семион Адлеиба раԥхьа днаргыланы ақәҿиарақәа рзеиӷьеишьоит.
"Рнапы злаку аус аганахь ала, оф, гәышьа рҳәо Анцәа иҟаиҵааит, бзиа иаҳбоит. Рыбжьы ԥсышәала иҳаҳалаааит, адунеи иқәыҩлааит! Ақәҿиарақәа!"
