Амра Амҷԥҳа, Sputnik.
Аԥсны зҽаԥсазтәыз акультура аусзуҩ, ажурналист Ҭина Қорсаиаԥҳа Аԥсуа радио ахь даннеиз, раԥхьатәи аамҭақәа раан адиктор Иван Саӡба аус ицылуан, аха адикторра лгәамԥхеит. "Аефир аҟны саҿахар ҳәа сшәон", — лҳәоит лара.
Ҭина еиҳа лгәы иахәон атематикатә дырраҭарақәа. Аԥсуа радио аредактор хада Артем Амқәаб иҟынтәи илоуит раԥхьатәи адҵа – Баграт Шьынқәба 60-шықәса ихыҵра иазкны апрограмма еиҿылкаарц.
"Раԥхьаӡа акәны Аԥсны жәлар рпоет Баграт Шьынқәба дызбеит, иасҳәеит иубилеи иазкны адырраҭара ҟасҵарц шысҭаху. Ажәеинраалақәа ирыԥхьарц иаабыԥхьода ҳәа данҵаа, инеиқәысыԥхьаӡеит: Леуарса Касаланӡиа, Нурбеи Камкиа, Еҭери Коӷониа, Шьалуа Гыцба рыхьыӡқәа. Баграт "Леуарса зегьы дреиӷьуп, аха уи сажәеинраалақәа дрыԥхьом", иҳәеит.
"Сара абри ашьҭахь "срепортиор" аашьҭыхны Леуарса Касланӡиа иахь сцеит. Сиҳәеит Баграт иажәеинраалак дысзаԥхьарц. Леуарса убасеиԥш даԥхьеит ажәеинраала, ашьҭахьы, иара ихаҭа иԥсыжра аҽны иадырҳәон. Исҳәар сҭахуп Леуарса зеиԥш дыҟамыз актиорн ҳәа. Иара и-Оттело еиӷьыз сара атеатр аҟны дсымбацызт", — лҳәоит лара.
Шьынқәба изкыз адырраҭара қәҿиарала имҩаԥганы Ҭина акультуратә тематика дазхьаԥшуа далагеит. Еиуеиԥшым аамҭақәа рзы иҭыҵуаз еиуеиԥшым адырраҭарақәа ирыҵубаауан лара лманера ҷыда.
Арадиожурналист лҟазара амаӡақәа ҳзаартуа илҳәеит:
"Аус ахьыжәуазаалак, арадио аҿоума, ателехәаԥшраҿы аума, агазеҭ аҿы аума шәзыҿцәажәо ауаҩы заҟа дышәзааигәашәтәуа шәусумҭа ианыԥшуеит. Ҩныҵҟала аинырра шәымазароуп", ҳәа.
Ажурналист илҳәоит аибашьраан, Аԥсны Мрагыларатәи ахәҭаҿы ауаа Аԥсуа радио ажәабжьқәа ажәак рцәыбжьахар ҳәа ишәаны иазыӡырыҩуан.
"Исгәалашәоит Тамшьтәи адесант аныӡхыҵыз, уа дрылан сыҷкәын заҵәгьы, ақырҭуа радио иӡхыҵыз 600-ҩык аибашьцәа зегьы ҭаҳархеит ҳәа рыланаҳәеит. Ақырҭцәа уи зыҟарҵоз изаҳауа аԥсуаа ргәашьамх рыҵаҳҟьап ҳәоуп. Аԥсуа радио иаразнакы, уи аҭакс иара иамаз адыррақәа ҟанаҵеит", — лҳәоит Қорсаиаԥҳа.
Уаанӡа ауаа рыҩнқәа рҟны арадиодкылагақәа кнаҳан.
"Уажәы амашьынақәа рыла ауаа амҩа ианықәу арадио иазыӡырыҩуеит. Шәзыӡырыҩцәа еснагь шәрыцҟаз", ҳәа азеиӷьалшьоит ажурналист ҳрадио Sputnik Аԥснгьы.
