АҞӘА, лаҵарамза 25 – Sputnik, Бадраҟ Аҩӡба. Владимир Касланӡиа – афилологиатә наукақәа рдоктор, апрофессор, алексикологиа, алексикографиа, афразеологиа рызҟаза ду 79 шықәса дшырҭагылаз, аԥшьаша, лаҵарамза 25 рзы иԥсҭазаара далҵит.
"Иԥсҭазаара далҵит ҳҩыза, ҳколлега, ҳҵарауаҩ Владимир Арушьан-иԥа. Аԥснытәи Аҳәынҭқарратә университет азы ари цәыӡ дууп. Иара иԥсҭазаара зегьы азкын аҿар реиҵааӡара", — лҳәеит "Англыз бызшәеи анемец бызшәеи", ркафедра адоцент Лариса Адлеиаԥҳа.
Владимир Касланӡиа 35 шықәса инарзынаԥшуа "Атәым бызшәақәа" ркафедра напхгара аиҭон.
Лариса Адлеиаԥҳа иазгәалҭеит Владимир Касланӡиа ҵарауаҩык иҳасаб ала илшамҭақәа акыр ишдууз.
"Иара аԥсуа бызшәеи анемец бызшәеи реиҿырԥшра инапы алакын, "Аԥсуа-аурыс жәар" ҭижьит", — лҳәеит Адлеиаԥҳа.
Владимир Касланӡиа иара убасгьы аспирантцәа ҿарацәа рҵара напхгара аиҭон.
"Аԥснытәи аспирантцәа рыдагьы иара атәым ҳәынҭқаррақәа рҟынтәгьы аспирантцәа иман, аӡәы Берзентәылатәын", — лҳәеит Адлеиԥҳа.
Афилологиатә наукақәа рдоктор, апрофессор, алексикологиа, алексикографиа, афразеологиа рызҟаза ду Владимир Касланӡиа диит 1938 шықәса рзы.
1954–1958 шықәсқәа рзы Аҟәатәи арҵаҩратә ҵараиурҭа дҭан.
1969 шықәса рзы Аҟәатәи арҵаҩратә ҵараиурҭа атәымбызшәақәа ркафедраҿ рҵаҩыс аусура далагоит.
1982 шықәса рзы ААУ анемец бызшәа акафедра аиҳабы. 1999 шықәса рзы ААУ анемец бызшәа акафедра апрофессор. 1998–1999шш. – СОИ аректор.
1993 шықәса инаркны ААУ анемец бызшәа акафедра аиҳабы, АБИГИ абызшәа аҟәша анаукатә усзуҩы.
