Амилаҭтә библиотека официалла иаартуп

© Sputnik / Томас ТхайцукАмилаҭтә библиотека официалла иаартуп
Амилаҭтә библиотека официалла иаартуп - Sputnik Аҧсны
Анапаҵаҩра
НовостиTelegram
Амилаҭтә библиотека акапиталтә ремонт азыруан нанҳәамза 2012 шықәса инаркны цәыббрамза 2015 шықәсанӡа, иахьа иара официалла иаартуп.

АҞӘА, рашәарамза 1 – Sputnik, Роберт Џьопуа. Иван Папасқьыр ихьӡ зху Амилаҭтә библиотека официалла иаадыртит рашәарамза 1 аҽны. Абиблиотека адиректор Борис Ҷолариа абри амш аныҳәамш ҳәа азиҳәеит, иазгәеиҭеит Аџьынџьтәылатә еибашьра ашьҭахь ишеиҭашьақәыргылоу ареспубликаҿы абиблиотекатә усхк.

"Ҳара иахьа иҳамоуп ҳаамҭа иақәшәоны еиқәыршәоу ахыбра ҿыц. Уи иалнаршоит иҟоу аиқәырхареи иҿыцу аколлекциақәа раԥҵареи", — иҳәеит Ҷолариа.

Аԥсны Ахада Рауль Ҳаџьымба иҳәеит Аԥсны Амилаҭтә библиотека аҭоурых ду змоу культуратә хәышҭаараны ишыҟоу, ажәлар рдоуҳатә культураҿ аҭыԥ ду шааннакыло.

"Жәашықәсала абиблиотекатә фондқәа рҟны аус руан ҳҵарауаа, ҳашәҟәыҩҩцәа, ҳжурналистцәа, ҳастудентцәа. Ақырҭуа-аԥсуа еибашьраан абиблиотека ааха ӷәӷәа аҭан. Аибашьра ашьҭахь шықәсыки бжаки ҵуаны иаартын аԥхьарҭатә зал. Уи зылзыршаз абиблиотека аколлектив роуп. Иахьазы ауадаҩрақәа шьҭахьҟа иныжьуп. Иахьазы Амилаҭтә библиотека еиқәыршәоуп реиҳа иҿыцу атехнологиақәа рыла", — иҳәеит Ҳаџьымба.

Абиблиотека аартра аколлектив ирыдиныҳәалеит Аԥсны иҟоу Урыстәылатәи Афедерациа Ацҳаражәҳәаҩ Семион Григориев. Иара иажәақәа рыла иарбанызаалак атәылаҟны абиблиотека акультуратә ԥсҭазаара иацентрны иҟоуп.

"Убри инақәыршәаны ауп Аԥсни Урыстәылеи рнапхгарақәа азхьаԥшра ду зарҭаз абиблиотека аиҭашьақәыргылара. Иахьа иара ҳаамҭа иақәшәо иҟоуп. Ҳәарада абиблиотека аиҭашьақәыргылара аамҭа рацәаны иагеит, аха иахьа уи зегьы ҳахысит. Ашәҟәы ауаҩы изы еснагь ахә ҳаракны ишьоуп", — иҳәеит Григориев.

Адипломат иазгәеиҭеит Аԥсны абиблиотека адунеи абиблиотекақәа зегьы ирыдҳәалахар шалшоа ҳаамҭазтәи атехнологиақәа инарықәыршәаны.

"Ари ныҳәа дууп аԥхьаҩцәа рзы адагьы ҳажәларқәа реизыҟазаашьақәа ҿиалар зҭаху рзгьы", — иҳәеит иара.

Аԥсны Амилаҭтә библиотека аремонт хацыркын 2012 шықәса рзы, ихыркәшан 2015 шықәса рзы. Уи ашьҭахь абиблиотека афонд аиҭашьақәыргылара иаҿын.

Ажәабжьқәа зегьы
0